Dhimbja që ndjehet nën kafazin e djathtë të brinjëve nuk duhet të neglizhohet, pasi në këtë zonë ndodhen disa organe jetësore, përfshirë mëlçinë, fshikëzën e tëmthit dhe veshkën e djathtë.
Sipas specialistëve, kjo dhimbje mund të jetë e mprehtë, e lehtë apo djegëse, e përkohshme ose kronike, dhe nganjëherë përhapet edhe në shpatull apo gilcë.
Shkaqet më të zakonshme përfshijnë gurët në tëmth, të cilët shkaktojnë dhimbje therëse që mund të zgjasin deri në 24 orë dhe shpesh nuk lehtësohen as nga ndryshimi i pozicionit.
Gjithashtu, gurët në veshka mund të japin dhimbje të forta që përhapen në pjesë të tjera të trupit, përfshirë gilcën dhe shoqërohen me vështirësi në urinim.
Një tjetër shkak i mundshëm është pankreatiti – inflamacioni i pankreasit – i cili mund të shkaktojë dhimbje të forta të shoqëruara me të vjella.
Në raste të rralla, edhe apendiciti fillon me dhimbje rreth kërthizës që më pas zhvendoset në anën e djathtë të barkut.
Problemet me mëlçinë, si cirroza ose inflamacionet, gjithashtu mund të sjellin dhimbje nën brinjën e djathtë. Ndërkohë, grumbullimi i gazrave në traktin tretës apo sëmundjet inflamatore të zorrëve (si sëmundja e Crohn-it ose koliti ulceroz) janë gjithashtu ndër shkaktarët më të zakonshëm.
Mjekët paralajmërojnë se edhe mushkëritë mund të jenë burim i dhimbjes në këtë zonë, veçanërisht në raste të infeksioneve si pneumonia ose pleuriti.
Kur mushkëria e djathtë preket, dhimbja mund të jetë e mprehtë dhe e përkeqësuar nga frymëmarrja e thellë ose kollitja.
Së fundmi, traumat fizike si dëmtimi i brinjëve ose organeve të brendshme mund të shkaktojnë dhimbje të menjëhershme dhe potencialisht të rrezikshme, siç është kolapsi i mushkërive.
Në të gjitha rastet, nëse dhimbja zgjat, përkeqësohet apo shoqërohet me simptoma si temperaturë, të përziera apo vështirësi në frymëmarrje, rekomandohet urgjentisht konsultimi me mjekun.
