Një video e një gruaje e cila, ndërsa qëndron në radhë në një sallë pritjeje, po shikon një pajisje që në shikim të parë duket si telefon, është përhapur me shpejtësi në internet. Por kur kamera zmadhon pajisjen, është e qartë se nuk është një telefon klasik sepse pajisja është transparente. Në komentet në rrjetet sociale, përdoruesit filluan të spekulonin se çfarë ishte dhe çuditërisht, disa ishin të bindur se ishte telefoni transparent i Nokia-s që kompania dyshohet se e prezantoi në fund të vitit të kaluar.
Kjo video u postua nga një përdoruese e TikTok (@askcatgpt) dhe pasi videoja u bë virale dhe tërhoqi shumë vëmendje nga përdoruesit, ajo shpjegoi se për çfarë bëhej fjalë në të vërtetë. Ajo që mban në dorë, sigurisht, nuk është një smartfonë, por siç e shpjegoi vetë, një metafon. Është një copë akriliku në formën e një telefoni që mund të blihet në internet, dhe është “shpikur” nga një mikeshë e saj për një arsye interesante.
Domethënë, ajo donte të zbulonte nëse një pajisje si kjo në formën e një smartfoni mund t’i ndihmonte njerëzit të bëheshin më pak të varur nga pajisjet e tyre. Ajo pyeste veten nëse njerëzit mund ta luftonin varësinë nga telefoni, me një pajisje që do ta zëvendësonte ndjesinë e të pasurit një telefon në xhep me diçka që u ofronte të njëjtën ndjesi. Interesante është se ajo vetë komentoi se nuk ndihet sikur e përdor më pak smartfonin e saj, pasi mban metafonin me vete. Pavarësisht dobisë së dyshimtë të pajisjes, kjo përdoruese e TikTokut thotë se metafoni është shitur plotësisht.
