Ai që sot rekomandohet nga ekspertët e ushqyerjes si një nga mëngjeset më të shëndetshme, ishte gjithashtu i preferuari i Princeshës Diana. Bëhet fjalë për tërshërë me fruta, të lënë në frigorifer gjatë natës. Ish-kuzhinieri mbretëror Darren McGrady, ka zbuluar në një video në YouTube me titull “Princess Diana’s Overnight Oats”, se Diana preferonte ta niste ditën me versionin zviceran të kësaj recete, të njohur si “muesli Bircher”.
Sipas McGrady, i cili ka gatuar për Dianën disa herë në ditë në Kensington Palace që nga viti 1993, princesha e zbuloi këtë mëngjes gjatë qëndrimit të saj në një klinikë shëndetësore në Zvicër. “Ajo ishte e mahnitur dhe tha: ‘Dua ta ha këtë çdo mëngjes’”, tregon McGrady. Ai shpjegoi se e mori recetën origjinale nga shpikësi i “mueslit Bircher”, Maximilian Oskar Bircher-Benner, i cili e kishte krijuar rreth vitit 1900 për sanatoriumin e tij “Forca e Gjallë”. McGrady e modifikoi vetëm pak dhe ia shërbente princeshës çdo mëngjes.
Unaza ikonike e fejesës e Princeshë Dianës me safir dhe diamante është bërë një nga pjesët më të famshme të koleksionit të saj të bizhuterive. Por kur Prince Charles i propozoi asaj në vitin 1981, kjo unazë jo vetëm që tërhoqi vëmendje, por edhe theu një traditë të gjatë mbretërore. Ndryshe nga zakonisht, Diana, atëherë Lady Diana Spencer e zgjodhi vetë unazën e saj të fejesës. Ajo e përzgjodhi nga një katalog i shtëpisë së bizhuterive Garrard, një furnizues i njohur i familjes mbretërore. Unaza kishte një safir oval prej 12 karatësh nga Ceiloni, i rrethuar nga 14 diamante, dhe në atë kohë vlente mbi 37 mijë dollarë.
Kjo zgjedhje shkaktoi polemika, sepse ndryshe nga unazat e tjera mbretërore që bëheshin me porosi (unikate), kjo unazë ishte e disponueshme për publikun. Pra, kushdo që kishte mjaftueshëm para mund të blinte të njëjtën unazë si ajo e princeshës së ardhshme. Dizajni i unazës ishte frymëzuar nga një karficë safiri që i përkiste Mbretëreshës Victoria, dhuratë nga bashkëshorti i saj Princi Albert në vitin 1840. Ajo e adhuronte aq shumë sa e vendosi në fustanin e saj të nusërisë si “diçka blu”. Kjo karficë u trashëgua ndër breza dhe u mbajt edhe nga Mbretëresha Elizabeth II. Kur Charles i paraqiti Dianës disa opsione unazash, ajo zgjodhi këtë model me safir dhe diamante, ndoshta edhe për ta përshtatur me sytë e saj blu.
