Kreu i koalicionit “Nisma Shqipëria Bëhet”, Adriatik Lapaj, zhvilloi një takim me qytetarët në Dimal, ku kritikoi ashpër kryeministrin për qëndrimin e tij ndaj problematikave të njerëzve dhe për fushatën e tij zgjedhore.
“E dëgjuat kryeministrin, del në mëngjes dhe bën si i dashur, bë një “sy më sy” me qytetarët,” tha Lapaj, duke e akuzuar kryeministrin se është bërë i ëmbël dhe i qeshur vetëm në prag të zgjedhjeve.
Ai theksoi se kryeministri nuk është i pranishëm për të dëgjuar zërin e qytetarëve kur merr vendime të rëndësishme, si ndërtimi i një kampi refugjatësh në Lezhë ose ndërtimi i një termocentrali në Roskovec.
“Pse nuk shkon të bisedojë me qytetarët kur merr këto vendime të rëndësishme? Pse nuk del të flasë me ta për hallet që kanë pasur gjatë këtyre katër viteve?” pyeti Lapaj.
Lapaj e përfundoi fjalën e tij duke bërë thirrje për mobilizim dhe vëmendje nga qytetarët, duke i paralajmëruar ata se kryeministri do t’i gënjejë sërish. “Kjo nuk është një betejë për të bërë karrierë, por është rruga e vështirë që ne kemi ndjekur për të mbrojtur interesat e qytetarëve,” tha ai.
Rama pse nuk shkon sy më sy të flasë me njerëzit, por merr vendime pa i pyetur fare. Pse nuk e bën këtë bashkëbisedimin gjatë katër viteve, por vetëm tani në fushatë. Mos e besoni, ndëshkojeni me votë!
Nuk del të thuash një hall tëndin, si për pronën, për shëndetin, për biznesin. Shqipëria duhet ta mbyllë këtë kapitull. Betejë edhe për prindërit tanë pensionistë, për fëmijët tanë në shkollë, për fermerët, betejë kundër atyre që ju tallin.
Imagjinoni që me 12 maj të jenë prapë këta, me siguri të tjerë do të largohen të tjerë nga vendi. U kemi prishur gjumin, por ne nuk luftojmë për veten, për një karrike deputeti, ne luftojmë që më 12 maj duhet të çajmë sistemin, lekët e oligarkëve do jenë tuajat” – tha Lapaj.
