Fituesi i Eurovisionit 2024, Nemo, ka shkaktuar një tronditje të madhe në botën e muzikës, pasi njoftoi se do t’i kthejë trofeun EBU-së në protestë ndaj pjesëmarrjes së Izraelit në Konkursin e 2026-ës.
Në një deklaratë të publikuar në Instagram, artisti tha se edhe pse është mirënjohës për komunitetin e Eurovisionit, “nuk ndjehet më se ky trofe u takon”, duke e lidhur vendimin me atë që Komisioni i Pavarur i OKB-së e ka përshkruar si gjenocid në Gaza.
Sipas Nemo-s, pjesëmarrja e Izraelit bie ndesh me vlerat bazë të festivalit, si uniteti, përfshirja dhe respekti për dinjitetin njerëzor.
Ky veprim i fortë vjen menjëherë pas mbledhjes së Asamblesë së Përgjithshme të EBU-së, ku shumica e anëtarëve shmangën votimin për pjesëmarrjen e Izraelit, një vendim që ka shkaktuar pakënaqësi të gjerë.
Irlanda, Spanja, Sllovenia, Holanda dhe Islanda kanë njoftuar tashmë se nuk do të marrin pjesë ose nuk do ta transmetojnë edicionin e ardhshëm.
Nemo akuzoi Eurovisionin se është shfrytëzuar shpesh për të “larë imazhin e një shteti të akuzuar për veprime të rënda”, ndërsa EBU pretendon neutralitet politik. Trofeun, artisti thotë se do ta dorëzojë personalisht në zyrat e EBU-së në Gjenevë, me mesazhin:
Jetoni sipas vlerave që predikoni.
Pas lajmit, konkurrentë të tjerë të Eurovision 2024 dolën publikisht në mbështetje të Nemo-s, duke e përshkruar si një akt “në anën e duhur të historisë”.
