Hailey Bieber ka folur hapur për një nga vendimet më të mëdha të karrierës së saj në biznes, pas marrëveshjes së bujshme për shitjen e markës së saj të kujdesit për lëkurën, Rhode, te e.l.f. Beauty.
Në një intervistë për TIME, modelja tregoi se kishte vendosur një kusht shumë të qartë që në fillim të negociatave: marka nuk do të shitej për më pak se 1 miliard dollarë.
Sipas saj, kjo ishte shifra që kishte në mendje që prej fillimit të projektit dhe nuk kishte ndërmend të hiqte dorë nga ai objektiv. Hailey tha se beson fort te fuqia e qëllimeve dhe mënyra se si njerëzit mund të materializojnë vizionin e tyre përmes punës dhe bindjes personale.
Pas finalizimit të marrëveshjes, Hailey Bieber mori rolin e drejtoreshës kreative dhe përgjegjëses për inovacionin e markës, duke mbetur e përfshirë në mënyrë aktive në zhvillimin e produkteve dhe identitetin e Rhode.
Ajo foli gjithashtu për filozofinë që dëshiron të ruajë te marka, duke theksuar se produktet e kujdesit për lëkurën duhet të jenë sa më të aksesueshme për konsumatorët.
Modelja pranoi se nuk i pëlqen ideja kur produktet shiten menjëherë dhe bëhen të vështira për t’u gjetur, pasi nuk dëshiron që klientët të ndihen të përjashtuar apo të mos kenë mundësi t’i blejnë.
Sipas saj, produktet cilësore nuk kanë pse të jenë domosdoshmërisht luksoze apo shumë të shtrenjta, ndaj Rhode synon të ofrojë produkte të përditshme me çmime më të përballueshme për publikun.
