Organizata palestineze Hamasi ka rënë dakord të dorëzojë armët, por vendos kushte të qarta për mënyrën se si do të zhvillohet ky proces.
Lajmi është bërë i ditur të dielën nga një burim i Hamasit për rrjetin Al Arabiya.Sipas burimit, Hamasi ka pranuar që armët të dorëzohen nën mbikëqyrjen ndërkombëtare, përmes një mekanizmi palestinezo-egjiptian.
Po i njëjti burim tha se Shtetet e Bashkuara janë në dijeni të kësaj marrëveshjeje.Dorëzimi i armëve është një nga pikat më të ndjeshme në çdo përpjekje për një marrëveshje paqeje, pasi nga kjo do të varet shumë edhe e ardhmja politike dhe sigurie në Rripin e Gazës.
Ndërkohë, burimi konfirmoi për Al Arabiya se Hamasi ka marrë garanci nga SHBA, përmes Katarit, për një tërheqje të përhershme të Izraelit nga Gaza, një tjetër kërkesë kyçe e Hamasit në bisedimet e ndërmjetësuara.
Rreth pengjeve: Rreth 30 prej tyre dyshohet se kanë humbur jetën
Sa i përket çështjes së pengjeve izraelite, burimi tha se nga rreth 50 pengje që mbeten ende në duart e Hamasit, rreth 30 mendohet se nuk janë më gjallë.
Po ashtu, sipas të njëjtës burim, Hamasi ka nisur mbledhjen e trupave të të vrarëve izraelitë dhe ka kërkuar ndërprerjen e bombardimeve nga Izraeli përmes ndërmjetësimit të Egjiptit, në mënyrë që të përfundojë procesi i mbledhjes dhe dorëzimit të trupave.
