Huawei Technologies e Kinës po përgatitet të testojë procesorin e saj më të ri dhe më të fuqishëm të Inteligjencës Artificiale (IA). Me këtë, ajo shpreson të zëvendësojë disa produkte të nivelit të lartë të gjigantit amerikan të çipave Nvidia. Huawei u është drejtuar disa kompanive kineze të teknologjisë për të testuar fizibilitetin teknik të çipit të ri, të quajtur Ascend 910D. Kompania kineze shpreson që versioni më i fundit i procesorëve të saj Ascend AI do të jetë më i fuqishëm se H100 i Nvidia me bazë në Kaliforni, dhe pritet të marrë grupin e parë të mostrave të procesorit që në fund të majit.
Versionet e mëparshme quhen 910B dhe 910C. Njerëzit e intervistuar tregojnë se çipi është në zhvillim të hershëm dhe do t’i nënshtrohet një sërë testesh për të vlerësuar performancën e tij dhe për ta përgatitur atë për përdorim nga klientët. Agjencia e lajmeve Reuters raportoi se Huawei planifikon të fillojë dërgesat masive të çipit të saj të përparuar të inteligjencës artificiale 910C për klientët kinezë që në muajin e ardhshëm. Huawei dhe konkurrentët e saj kinezë kanë pasur vështirësi për vite me radhë për të ndërtuar çipa të nivelit të lartë që mund të konkurrojnë me produktet e Nvidia-s për modelet e trajnimit, një proces ku të dhënat u ushqehen algoritmeve për t’i ndihmuar ata të mësojnë të marrin vendime të sakta.
Kompania kineze e teknologjisë, Huawei, është në qendër të një hetimi për korrupsion nga autoritetet belge, çka ka bërë që grupi evropian i lobimit teknologjik, DigitalEurope, të pezullojë anëtarësimin e saj. Vendimi vjen pasi prokurorët belgë hapën një hetim mbi dyshimet për korrupsion. Në një deklaratë, DigitalEurope tha se është në dijeni të akuzave serioze ndaj Huaweit, sipas raportimeve të Politico. “Marrim shumë seriozisht sjelljen etike në biznes dhe përputhshmërinë me ligjin. Si një masë paraprake, anëtarësimi i Huaweit është pezulluar deri në një njoftim të mëtejshëm”-thuhet në deklaratë.
