Një nga problemet më të mëdha është mungesa e stacioneve të karikimit. Kjo është e lidhur drejtpërdrejt me shqetësimin dhe pasigurinë e pronarëve dhe drejtuesve të automjeteve elektrike. Në tregun më të rëndësishëm evropian, Gjermaninë, duket se po shfaqet një lloj i ri shqetësimi. Investimet e larta në stacionet e karikimit po duken gjithnjë e më të vështira për t’u justifikuar financiarisht në një afat të shkurtër. Numri i regjistrimeve të reja të automjeteve elektrike në Bashkimin Evropian është rritur me gati një të katërtën, duke arritur në rreth 413 mijë njësi në tremujorin e parë të vitit 2025, krahasuar me të njëjtën periudhë të vitit të kaluar.
Megjithatë, sipas Shoqatës së Prodhuesve Evropianë të Automjeteve (ACEA), kjo shifër është më e ulët se sa pritej. Si një nga arsyet për rritjen më të ngadaltë të shitjeve është përmendur mungesa e stacioneve të karikimit. Por, a është kjo arsyeja e vërtetë? Numri i stacioneve publike të karikimit në Gjermani është rritur me rreth një të pestën, duke arritur në 161.686 në krahasim me vitin e kaluar. Kjo përfshin edhe 36.278 stacione karikimi të shpejtë, numri i të cilave është rritur me 39 për qind brenda një viti.
Megjithatë, mijëra nga këto stacione karikimi mbeten kryesisht të pashfrytëzuara. Për këtë arsye, shumë kompani që instalojnë pajisje karikimi po planifikojnë të ngadalësojnë ritmin e zgjerimit dhe të ulin investimet në këtë sektor. Kalifornia është një nga tregjet më të mëdha për automjetet elektrike, që do të thotë se ka një kërkesë të madhe për infrastrukturën e karikimit. Megjithatë, shteti po arrin të përballojë sfidën. Komisioni i Energjisë në Kaliforni njoftoi së fundmi se 178,549 karikues publiko-privatë dhe privatë janë instaluar në të gjithë shtetin. Ky është një numër mbresëlënës, veçanërisht duke pasur parasysh se ka rreth 120,000 pika karburanti në Kaliforni.
