Një vend tjetër po mendon të ndalojë rrjetet sociale për të miturit. Qeveria zvicerane do të shqyrtojë nëse ndalimi i qasjes në platforma të tilla si TikTok dhe Instagram, për moshat nën 16 vjeç do të ndihmonte në mbrojtjen e të miturve nga ndikimi i rrjeteve sociale. Ndër të tjera, qeveria zvicerane do të shqyrtojë nëse ndalimi i telefonave në shkolla mund të mbrojë të miturit. Australia po përgatitet të testojë teknologji të ndryshme për të parandaluar aksesin në median sociale nga fëmijët nën 16 vjeç dhe në përmbajtje pornografike nga fëmijët nën 18 vjeç.
Masat janë pjesë e një strategjie më të gjerë që synon përmirësimin e sigurisë në web. Në detaje, projekti do të eksplorojë tre mënyra të ndryshme për të garantuar moshën e përdoruesve, duke balancuar saktësinë, besueshmërinë dhe respektimin e privatësisë, me objektivin përfundimtar të përcaktimit të një standardi rregullator që do të miratohet në të ardhmen për të rregulluar aksesin në rrjetet sociale nga të miturit.
Teknologjia e parë në shqyrtim është verifikimi i thjeshtë i moshës përmes kredencialeve, të tilla si një ID ose pasaportë digjitale. Kjo zgjedhje përfaqëson metodën më të menjëhershme, por mund të anashkalohet nëse një i mitur përdor dokumente të palëve të treta. Propozimi i dytë bazohet në analizën e karakteristikave biologjike dhe të sjelljes, si studimi i tipareve të fytyrës dhe timbrit vokal, falë ndihmës së ofruar nga Inteligjenca Artificiale. Megjithatë, saktësia e këtyre mjeteve është e kufizuar dhe eksperimentet e mëparshme tregojnë një marzh mesatar gabimi prej 3 vjetësh e 8 muajsh, me vetëm përafrime pak më të mira tek adoleshentët.
