Kylie Jenner tërhoqi vëmendjen në tapetin e kuq të Academy Awards, ku u shfaq me një fustan të kuq të ndezur dhe plot shkëlqim, ndërsa mbështeste partnerin e saj, aktorin Timothée Chalamet. Çifti mori pjesë në edicionin e 98-të të ceremonisë “Oscar”, ku Chalamet ishte një nga pretendentët kryesorë për çmimin “Aktori më i mirë” për rolin e tij në filmin Marty Supreme. Megjithatë, çmimi përfundoi në duart e Michael B. Jordan për interpretimin në filmin Sinners.
Pak para ceremonisë, Jenner, 28 vjeçe, publikoi në Instagram një video ku tregonte veshjen e saj për mbrëmjen. Ajo kishte zgjedhur një fustan elegant dhe të hapur në dekolte nga marka luksoze Schiaparelli, i cili theksonte linjat e saj trupore. Në përshkrimin e videos, ajo la të kuptohej se frymëzimi për pamjen e saj vinte nga personazhi i famshëm i animuar Jessica Rabbit.
Paraqitja e saj mori shumë komente pozitive nga miqtë dhe të famshmit e rrethit Kardashian-Jenner në rrjetet sociale. Gjatë gjithë sezonit të çmimeve në vitin 2026, Jenner ka qenë shpesh në krah të Chalamet, i cili ishte ndër favoritët kryesorë pas fitores në Golden Globe Awards. Dyshja janë shfaqur disa herë së bashku në evente publike, përfshirë edhe premierën e filmit në Los Angeles, ku u paraqitën me veshje të koordinuara me ngjyrë portokalli.
Megjithatë, marrëdhënia e tyre ka qenë shpesh në qendër të spekulimeve. Në muajt e fundit u përhapën thashetheme për probleme mes tyre, sidomos pasi fansat vunë re një distancë gjatë një ndeshjeje të New York Yankees, ndërsa mungesa e Chalamet në festën e 70-vjetorit të Kris Jenner shtoi më tej zërat për një krizë në çift. Sipas disa burimeve të mediave ndërkombëtare, një nga arsyet e tensioneve lidhet me faktin se Chalamet preferon ta mbajë marrëdhënien më private, ndërsa Jenner dëshiron ta ndajë më shumë me publikun.
