Lady Gaga ka rrëmbyer vëmendjen në premierën e filmit “The Devil Wears Prada 2”, duke u shfaqur me një stil elegant dhe tërësisht klasik në tapetin e kuq të organizuar në Lincoln Center, në New York City.
Këngëtarja dhe aktorja 40-vjeçare u paraqit me një fustan të zi pa rripa, të ngushtë pas trupit dhe me fund në stil sirene, duke krijuar një look të sofistikuar që u komentua gjatë nga të pranishmit dhe mediat.
Në këtë event të shumëpritur, ajo u bashkua me emra të mëdhenj të filmit si Anne Hathaway, Meryl Streep dhe Emily Blunt, të cilat gjithashtu tërhoqën vëmendjen me paraqitjet e tyre.
Pamjen elegante, Gaga e plotësoi me aksesorë minimalë, duke vënë në pah vathët me diamante dhe unazën e fejesës. Flokët biondë platini i kishte stiluar në një bisht të ulët me ndarje anësore, ndërsa grimi ishte i lehtë dhe natyral, në harmoni me stilin klasik të mbrëmjes.
Artistja është e fejuar me sipërmarrësin Michael Polansky, i cili i propozoi në korrik të vitit 2024, pas disa vitesh lidhjeje.
Vetëm pak ditë më parë, Gaga përmbylli me sukses turneun e saj botëror “Mayhem Ball Tour”, i cili u zhvillua në pesë kontinente përgjatë një viti dhe rezultoi një sukses i jashtëzakonshëm.
Sipas të dhënave, turneu gjeneroi rreth 419.5 milionë dollarë dhe shiti afro dy milionë bileta, duke e renditur mes turneve më fitimprurëse të realizuara ndonjëherë nga një artiste femër.
