Këngëtarja Fifi ka reaguar ashpër ndaj valës së komenteve negative dhe ofenduese që ka marrë në rrjetet sociale pas publikimit të këngës së saj në festival.
Në një intervistë së fundmi, artistja ka folur për herë të parë hapur për përmasat tronditëse të sulmeve online, të cilat sipas saj nuk janë ndalur vetëm tek ajo, por kanë prekur edhe djalin e saj.
Fifi tregoi se gjithçka ka nisur menjëherë pas publikimit të këngës së festivalit. Deri në atë moment, ajo thekson se nuk kishte marrë asnjë koment që lidhej me fëmijën e saj, ndërsa situata ndryshoi rrënjësisht brenda pak ditësh.
Që nga dita kur doli kënga e festivalit, më kanë ardhur komente duke më mallkuar djalin
-u shpreh këngëtarja, duke e cilësuar këtë si goditjen më të rëndë që ka përjetuar ndonjëherë në karrierën e saj.
Sipas Fifit, brenda vetëm një jave ajo ka marrë rreth 300 komente, nga të cilat afërsisht 200 ishin mallkime të drejtpërdrejta ndaj djalit të saj.
Artistja ngriti edhe dyshime se kjo mund të mos ketë qenë një reagim spontan, por një sulm i organizuar.
Para dy javësh nuk kishte asnjë koment për djalin tim. Papritur, brenda një jave, 200 mallkime për një fëmijë që nuk ka asnjë lidhje me këtë
-tha ajo, duke shtuar se është e gatshme të përballojë çdo kritikë personale, por jo sulme ndaj fëmijës së saj.
Reagimi i Fifit ka hapur një debat të gjerë mbi gjuhën e urrejtjes në rrjetet sociale dhe kufijtë që nuk duhet të kalohen, veçanërisht kur në shënjestër vendosen fëmijët.
