Lufta në Iran ka ndërprerë pjesën më të madhe të trafikut ajror mes Europës dhe Azisë. Derisa kriza të zbutet, pushimet me destinacione të gjata, veçanërisht ato me fluturime të shumta ose ndalesa në Lindjen e Mesme, mbeten rrezik real.
Si alternativa rekomandohen destinacione europiane ose mesdhetare duke shmangur qendrat e Gjirit Persik si Dubai, Abu Dhabi e Doha. Normalisht, ato përballojnë një të tretën e fluturimeve mes Europës dhe Azisë, të mbyllura përkohësisht. Numërohen rreth 70 mijë fluturime të anuluara dhe 14 milion pasagjerë të bllokuar vetëm në pak javë, duke gjeneruar miliarda euro humbje për sektorin ndërkombëtar të turizmit.
Fluturime të rezervuara: çfarë duhet të dini
Për këdo që tashmë ka rezervuar për në destinacione aziatike ose ata me një ndalesë në Lindjen e Mesme, situata mbetet e paqëndrueshme. Shumë linja ajrore po ofrojnë rimbursime të plota ose kuponë fleksibël.
Ka të ngjarë që në javët në vijim, vetëm fluturimet direkte midis Europës dhe Azisë Lindore (p.sh.,Japonia ose Koreja e Jugut) të mbeten funksionale, por me rrugë më të gjata e kosto më të larta, për shkak të devijimeve nga zonat e luftës. Në përgjithësi, ata që fluturojnë me linja ajrore europiane kanë garanci dhe ndihmë më të madhe operative në rast anulimesh se ata që fluturojnë me transportues të Lindjes së Mesme ose Azisë.
Destinacionet më të sigurta (dhe ato që duhen shmangur)
Trafiku ajror për në Lindjen e Mesme (Irani, Izraeli, Libani, Emiratet e Bashkuara Arabe, Arabia Saudite, Omani) është aktualisht i kufizuar rëndë, me rrezikun e mbylljes së papritur të hapësirës ajrore. Destinacionet në Azinë Jugore si India, Sri Lanka, Malajzia dhe Maldivet po përjetojnë vështirësi në lidhje, për shkak të pamundësisë për të kaluar tranzit përmes Dubait ose Dohas. Fluturimet për në Oqeani dhe Azinë Juglindore janë më të gjata dhe i nënshtrohen vonesave apo ndalesave shtesë.
Europa Mesdhetare, si Spanja, Portugalia, Greqia dhe Ishujt Kanarie, janë destinacione të rekomanduara sepse mbeten plotësisht funksionale. Austria, Gjermania, Holanda, Skandinavia dhe Europa Veriore në përgjithësi nuk po përjetojnë ndërprerje.
Afrika e Veriut (duke përjashtuar Egjiptin) ka gjithashtu mbërritje të qëndrueshme, me Tunizinë dhe Marokun lehtësisht të arritshëm nëpërmjet fluturimeve direkte. Për ata që kërkojnë mot më të ngrohtë, ishujt grekë, Italia jugore dhe Ishujt Balearik ofrojnë alternativa të mira pa rrezikun e anulimeve për shkak të krizës.
