Ndalimi i aplikacioneve të ByteDance do të thotë se CapCut, një nga aplikacionet më të njohura të modifikimit të videove në formë të shkurtër në dyqanet e aplikacioneve në SHBA, u bë gjithashtu i padisponueshëm. Në të njëjtën ditë, Meta prezantoi CapCut-in e vet të ngjashëm; një aplikacion të quajtur Edits. “Ne mendojmë se është detyra jonë të krijojmë mjetet më bindëse krijuese për ata prej jush që bëjnë video jo vetëm për Instagramin, por për platformat atje siç mundemi”-tha shefi i Instagramit, Adam Mosseri në një video në Instagram dhe Threads.
Mosseri tha se aplikacioni nuk do të nisë deri në shkurt dhe se versioni i parë do të jetë “i paplotë”. Aplikacioni është i disponueshëm për paraporosi në Apple App Store dhe së shpejti do të vijë edhe në Android. Rikujtojmë, se udhëzimet e përditësuara të Metas për gjuhën e urrejtjes lejojnë përdoruesit t’i quajnë njerëzit të sëmurë mendorë, bazuar në seksualitetin ose identitetin e tyre gjinor. Udhëzimet, të cilat u përditësuan të martën, ende nuk lejojnë përdoruesit e Facebook, Instagram ose Threads të fyejnë njerëzit bazuar në shëndetin e tyre mendor përveç në këtë skenar të ri, specifik.
Udhëzimet tani thonë: “Ne i lejojmë pretendimet për sëmundje mendore ose anomali kur bazohen në gjini ose orientim seksual, duke pasur parasysh diskursin politik dhe fetar rreth transgjinorëve dhe homoseksualëve”. Tani, Stonewall, shoqata më e madhe LGBT+ në Mbretërinë e Bashkuar ka njoftuar se ka kërkuar një takim me Metan për të ngritur shqetësimet e saj. “Urrejtja dhe dezinformimi në internet dëmton mënyrën se si shoqëria i shikon dhe trajton grupet e margjinalizuara dhe minon kohezionin shoqëror”-tha shefi ekzekutiv i Stonewall, Simon Blake. “Qasja e Metas e vendos politikën mbi njerëzit kur shumë janë tashmë të shqetësuar për toksicitetin e diskursit online, duke rrezikuar më tej ndarjen në vend që të nxisë komunitetin”-shtoi ai.
