Ministrja spanjolle e shëndetësisë konfirmon se shtetasi britanik i cili është evakuuar nga anija turistike ishte mjek në anije.
Sipas saj ai tani është në një gjendje më të “qëndrueshme” pasi më parë ishte në një “gjendje kritike”. Ndërkohë shton se po evakuohet në Holandë, në vend të Spanjës, gjë që më parë ishte një mundësi.
Më parë, ministria e jashtme holandeze konfirmoi se një britanik 56-vjeçar ishte evakuuar nga anija MV Hondius.
Të gjithë ata që kanë mbetur në anije nuk kanë simptoma, thotë ministrja, duke shtuar se anija do të vazhdojë për në Ishujt Kanarie, në një “port dytësor” në Tenerife. Më pas të gjithë pasagjerët do të evakuohen, përpara se të riatdhesohen.
LEXO EDHE: Çfarë është hantavirusi vdekjeprurës? Nga simptomat, rreziqet dhe transmetimi!
Hantavirusi i referohet një grupi virusesh të bartura nga brejtësit, të transmetuara kryesisht tek njerëzit përmes thithjes së grimcave ajrore nga jashtëqitjet e thata të brejtësve. Sipas Qendrave Amerikane për Kontrollin dhe Parandalimin e Sëmundjeve, hantaviruset mund të shkaktojnë dy sëmundje serioze. E para është sindroma pulmonare e hantavirusit, e cila prek mushkëritë dhe mund të çojë në dështim të rëndë të frymëmarrjes. E dyta është ethet hemorragjike me sindromën renale, e cila prek veshkat dhe mund të shkaktojë komplikacione serioze.
Kontakti me brejtësit e infektuar ose urinën, pështymën ose jashtëqitjet e tyre – veçanërisht kur këto materiale trazohen dhe përhapen në ajër – është mënyra kryesore e përhapjes së hantavirusit. Njerëzit zakonisht ekspozohen në hapësira të mbyllura ose të ajrosura dobët, siç janë shtëpitë, kabinat ose hambaret, ku është i pranishëm aktiviteti i brejtësve. Edhe pse e rrallë, Organizata Botërore e Shëndetësisë thotë se hantaviruset mund të përhapen edhe drejtpërdrejt midis njerëzve. Studiuesi australian i viruseve, Paul Griffin, i tha Agjencisë Australiane të Lajmeve se rreth 150,000 deri në 200,000 infeksione të hantavirusit identifikohen në të gjithë botën çdo vit. “Është shumë e rrallë që të përhapet nga njeriu te njeriu”, tha ai.
