Për mbi një orë gjatë natës, Moldavia, shtet që gjendet në kufi me Ukrainën, mbylli hapësirën ajrore pas inkursionit të dronëve të rinj. Lajmin e dha sot Ministria e Mbrojtjes moldave. Ky vend i vogël pranë Ukrainës së shkatërruar nga lufta dhe Rumanisë, vend anëtar i NATO-s, vazhdimisht përballet me shkelje të hapësirës ajrore që kur Moska nisi pushtimin e shtetit fqinj, në shkurt të vitit 2022.
Incidenti më i fundit vjen në kohën kur më herët këtë javë, Moldavia raportoi se një dron ishte rrëzuar në territorin e saj. Ishte pjesë e gjashtëshes që i kishte kaluar hapësirën ajrore.
Hapësira ajrore e Moldavisë u mbyll përkohësisht për afro një orë e 10 minuta, në orarin 22:43 me 23:53, si masë emergjente, pasi dy dronë të paidentifikuar fluturuan ilegalisht mbi territorin kombëtar, duke krijuar një kërcënim të drejtpërdrejtë për sigurinë e aviacionit, deklaroi Ministria e Mbrojtjes në një komunikatë për media të publikuar sot.
Burime zyrtare shtuan se dronët e tipit “Gerbera” nuk ishin zbuluar nga radarët e Moldavisë, por depërtimi i tyre u “konfirmua nga autoritetet kufitare ukrainase”.
Nuk janë identifikuar objekte, copëza apo elemente që paraqesin rrezik për popullsinë dhe të dy dronët u larguan nga hapësira ajrore kombëtare, duke u futur thellë në territorin ukrainas, theksoi Ministria e Brendshme në një tjetër komunikatë.
Megjithatë, dy avionë që po lëviznin drejt kryeqytetit moldav Kishinau nga Parisi dhe Barcelona, devijuan fluturimet për në Rumani në orarin e mbylljes. Një tjetër aeroplan që përgatitej të nisej nga Kishinau, u ndalua përkohësisht.
Moldavia i dënon fuqishëm këto veprime të paligjshme dhe të rrezikshme e që vunë në rrezik sigurinë e fluturimeve civile dhe jetët e njerëzve, njoftoi Ministria e Mbrojtjes, duke i cilësuar shkeljet si “akte armiqësore të frikësimit dhe destabilizimit”.
Të mërkurën e kësaj jave, Moldavia thirri ambasadorin rus në takim, për shkak të rrëzimit të një droni. Pasi dronin e rrëzuar e vuri para Ministrisë së Jashtme, i dorëzoi diplomatit një notë proteste.
