I rrethuar nga policë, kryebashkiaku i shkarkuar i Tiranës, Erion Veliaj ka mbërritur në Gjykatën Kushtetuese. U prit me brohoritje nga qytetarë që thërritën: Forca lali!
I prangosur dhe nën shoqërinë e masave të rrepta të sigurisë, Veliaj zbriti i buzëqeshur rreth orës 09:30 nga furgoni i policisë ku e prisnin gazetarët, të cilët po ndjekin hap pas hapi seancën e sotme.
Përfaqësuesit ligjorë të Veliajt në seancën e sotme në Kushtetuese janë Ermal Yzeiraj e Alban Dokushi.
Seanca nis në orën 10:00, me relatore Sonila Bejtjan. Më herët, Kushtetuesja njoftoi praninë e Veliajt në seancë, pasi kishte shprehur vullnetin e tij. Për këtë arsye, gjykata kërkoi nga Drejtoria e Burgjeve marrjen e masave për ta shoqëruar nga paraburgimi i Durrësit, ku ndodhet prej muajit shkurt. Po ashtu u njoftua SPAK-u.
