Karim Adeyemi, ylli i Borussia Dortmundit dhe partneri i rep-artistes shqiptare Loredana, ka tërhequr vëmendjen në rrjetet sociale me një veprim që lidhet drejtpërdrejt me kulturën shqiptare.
Futbollisti është shfaqur së fundmi me një çifteli në duar, duke u përpjekur të mësojë të luajë instrumentin tradicional shqiptar.
Pamjet janë publikuar nga vetë Loredana në rrjetet e saj sociale, ku Adeyemi shihet i përqendruar teksa eksperimenton me tingujt e çiftelisë.
Në një postim tjetër, ai shfaqet sërish duke ushtruar, duke dhënë përshtypjen se po e merr seriozisht këtë “sfidë” kulturore.
Ky veprim ka ngjallur reagime pozitive nga fansat shqiptarë, të cilët e kanë përshëndetur interesin e futbollistit për traditat e vendit të partneres së tij.
Në fakt, kjo nuk është hera e parë që Karim Adeyemi shfaq respekt dhe afeksion ndaj kulturës shqiptare.
Vitin e kaluar, ai vizitoi Kosovën, ku ndaloi edhe pranë memorialit të UÇK-së në Shtërpcë, një gjest që u vlerësua gjerësisht në rrjet.
Për më tepër, Adeyemi ka bërë edhe simbolin e shqiponjës me duar, një shenjë e njohur identitare për shqiptarët, duke treguar hapur lidhjen emocionale dhe respektin që ka krijuar ndaj kësaj kulture.
Veprimet e tij po komentohen gjerësisht si një dëshmi se marrëdhënia me Loredanën ka ndikuar jo vetëm në jetën personale, por edhe në afrimin e tij me traditat dhe simbolikën shqiptare.
