Paris Hilton ka vendosur të flasë pa filtra për një nga plagët më të mëdha të jetës së saj, duke rikthyer në vëmendje kasetën intime të vitit 2004, e cila u publikua pa pëlqimin e saj. Ajo theksoi se ajo që për vite me radhë u etiketua si “skandal”, në të vërtetë ishte një formë e rëndë abuzimi.
Të enjten, më 22 janar, Hilton mbajti një fjalim në Capitol Hill, krah kongresmeneve Alexandria Ocasio-Cortez dhe Laurel Lee, në mbështetje të Aktit DEFIANCE.
Projektligji, i miratuar nga Senati javën e kaluar, synon t’u japë viktimave të përmbajtjeve seksuale të krijuara ose të manipuluara me inteligjencë artificiale të drejtën për të ndjekur ligjërisht personat që i prodhojnë, shpërndajnë apo i kërkojnë këto materiale.
Gjatë fjalës së saj, Hilton u ndal te periudha më e errët e rinisë, duke përshkruar pasojat emocionale që la pas publikimi i videos intime.
Kur isha 19 vjeç, një video private u shpërnda në mbarë botën pa pëlqimin tim. Të gjithë e quajtën skandal. Nuk ishte i tillë. Ishte abuzim
-u shpreh ajo, duke shtuar se në atë kohë mungonin plotësisht ligjet që do ta mbronin, ndërsa interneti ishte ende një territor i paeksploruar, bashkë me format e reja të dhunës që solli.
Hilton rrëfeu se reagimi publik ishte shkatërrues: tallje, ofendime dhe heshtje përballë dhimbjes së saj.
Sipas saj, vuajtja personale u kthye në sensacion dhe klikime, ndërsa asaj iu kërkua të heshtte dhe të vazhdonte përpara sikur asgjë nuk kishte ndodhur.
Ajo sqaroi gjithashtu se nuk përfitoi asnjëherë financiarisht nga publikimi i videos.
Shumën prej 400 mijë dollarësh që mori nga ish-partneri Rick Solomon, i cili kishte publikuar materialin, ajo e dhuroi për bamirësi.
Unë pata mundësinë ta rimarr historinë time, por shumë njerëz nuk e kanë këtë luks
-tha Hilton.
Ajo theksoi se imazhet e tilla nuk zhduken kurrë, por mbeten të gjalla në kujtesë, njësoj si forca për të folur dhe për t’u shëruar.
Sot qëndroj këtu pa turp: jam një grua, një nënë dhe një e mbijetuar. Ajo që më ndodhi ishte e gabuar dhe do të vazhdoj të flas për çdo vajzë dhe çdo grua.
Në autobiografinë e saj “Paris: The Memoir”, botuar në vitin 2024, Hilton zbulon se ishte ndier nën presion nga ish-partneri për realizimin e videos, me premtimin se ajo do të mbetej private.
Ajo rrëfen se, për të përballuar traumën, konsumoi alkool dhe qetësues, ndërsa në momentin kur videoja u bë publike, marrëdhënia e tyre kishte përfunduar prej kohësh.
