Autori dhe eksperti për çështjet e familjes mbretërore britanike, Omid Scobie, ka bërë një analizë të fundit mbi marrëdhënien mes Princ Harry dhe Princ William, duke thënë se tensionet ndërmjet tyre nuk kanë ndryshuar prej vitesh.
Sipas Scobie, dinamika mes dy vëllezërve mbetet thuajse e njëjtë si tre vite më parë. Në vitin 2023, Harry ende shpresonte për një moment të hapur diskutimi me William-in, ku të mund të trajtonin mosmarrëveshjet e akumuluara gjatë viteve dhe të ecin përpara.
Megjithatë, edhe në vitin 2026, situata duket e pandryshuar.
Pritshmëritë dhe dëshirat e Harry-t mbeten të njëjta, por asnjëra nuk është përmbushur
-shpjegon Scobie.
Tensioni mes Dukës së Sussex-it dhe Princit të Uellsit ka nisur të paktën që nga viti 2020, kur Harry dhe bashkëshortja e tij, Meghan Markle, vendosën të tërhiqen nga rolet e tyre aktive në familjen mbretërore.
Situata u përkeqësua edhe më shumë për shkak të intervistave publike, dokumentarit në Netflix dhe librit autobiografik të Harry-t.
Sipas Scobie, Harry ka bërë disa përpjekje për t’u afruar me vëllain, si drejtpërdrejt ashtu edhe përmes miqve të përbashkët, por nga ana e William nuk ka pasur të njëjtin reagim.
Ndërkohë, marrëdhënia mes Harry-t dhe babait të tij, Mbretit Charles, ka treguar momente më të ngrohta, por e njëjta gjë nuk ka ndodhur me William.
Eksperti përfundon duke theksuar se për të rregulluar marrëdhëniet familjare nevojiten përpjekje nga të dy palët, por duket se komunikimi mes dy vëllezërve mbetet ende i ngrirë.
