Modelja dhe vajza e legjendës së muzikës Michael Jackson, Paris Jackson, ka ndarë një mesazh tejet emocional në Instagram, me rastin e gjashtë vjetorit të jetës së saj pa alkool dhe drogë. Përmes një postimi prekës, ajo hapi zemrën për sfidat e rimëkëmbjes, shëndetin mendor dhe dha një mesazh mbështetës për të gjithë ata që po përballen me beteja të ngjashme.
Paris publikoi një video përmbledhëse me momente nga viti i kaluar kujtime me miqtë, çaste të përditshme, duke luajtur kitarë dhe kohë të kaluar me qenin e saj.
Ajo theksoi se largimi nga substancat nuk e bën jetën automatikisht të përsosur, por është një proces i vazhdueshëm dhe sfidues.
Pas disa vitesh, gjithçka u bë jashtëzakonisht e vështirë. Më dukej sikur koha nuk kalonte dhe nuk kisha më të njëjtat mekanizma mbijetese. Më duhej të mësoja ta jetoja jetën sipas kushteve të saj
-rrëfeu ajo me sinqeritet.
Në postim, Paris foli hapur edhe për problemet e shëndetit mendor me të cilat është përballur gjatë gjithë jetës së saj, përfshirë çrregullimin depresiv të rëndë rezistent ndaj trajtimit, PTSD dhe OCD.
Ajo u drejtua drejtpërdrejt ndjekësve që po përjetojnë vështirësi të ngjashme, duke u dhënë kurajë dhe dashuri.
Nëse po përballeni me diçka të tillë, nuk jeni vetëm. Qëndroni të fortë dhe, nëse askush nuk jua ka thënë sot, unë ju dua
-shkroi ajo.
Paris Jackson ka folur edhe më herët publikisht për rrugëtimin e saj drejt shërimit. Në janar të vitit 2025, ajo shënoi pesë vjet esëll, duke theksuar se mirënjohja që ndjen nuk mund të përshkruhet me fjalë.
Ndërsa në fund të vitit, ajo ndau një video ku tregoi dëmtimin e hundës së saj të shkaktuar nga përdorimi i drogës, duke dhënë një mesazh të drejtpërdrejtë paralajmërues:
Mos merrni drogë.
Ajo zbuloi gjithashtu se kishte zgjedhur të mos kryente ndërhyrje kirurgjikale për shkak të frikës nga përdorimi i qetësuesve kundër dhimbjeve, duke treguar edhe një herë vendosmërinë e saj për të qëndruar në rrugën e shërimit.
