Brooklyn Beckham dhe bashkëshortja e tij, Nicola Peltz, janë shfaqur për herë të parë në publik që pas publikimit të deklaratës tronditëse gjashtëfaqëshe ku ai sulmoi hapur familjen e tij.
Çifti u pa në Malibu, gjatë një shëtitjeje të qetë buzë detit, duke treguar një imazh krejt ndryshe nga tensioni që ka pushtuar mediat ndërkombëtare.
Pavarësisht zhurmës globale dhe polemikave të forta që pasuan deklaratën e Brooklynit, 26-vjeçari dhe aktorja 31-vjeçare dukeshin të relaksuar, të buzëqeshur dhe më të afërt se kurrë, teksa ecnin krah për krah me qenin e tyre të adoptuar, Lamb. Brooklyn e mbante Nicolën të përqafuar, ndërsa ajo nuk e fshehte lumturinë.
Kjo dalje vjen vetëm pak ditë pasi Brooklyn publikoi një deklaratë të ashpër ku akuzoi prindërit e tij, David dhe Victoria Beckham, për ndërhyrje të vazhdueshme në martesën e tij dhe për mungesë mbështetjeje ndaj bashkëshortes.
Në tekst, ai pretendonte se ishte quajtur “i keq” nga e ëma dhe deklaroi hapur se nuk dëshiron më pajtim me familjen.
Sipas mediave britanike, Brooklyn nuk pendohet për atë që ka bërë. Një burim për “The Mirror” ka thënë se ai “do ta bënte sërish pa hezitim” dhe se tani dëshiron vetëm të jetojë i qetë me gruan që dashuron.
Ndërkohë, Nicola u shfaq me një stil casual-chic, e veshur me ponço ngjyrë krem dhe xhinse, ndërsa Brooklyn zgjodhi një veshje të thjeshtë, duke reflektuar një atmosferë të qetë dhe intime mes tyre. Çifti u pa duke biseduar, qeshur dhe shijuar momentin, pa asnjë shenjë stresi.
Nga ana tjetër, familja Beckham po përpiqet të qëndrojë larg deklaratave publike. David Beckham ndodhet në Zvicër për Forumin Ekonomik Botëror, ndërsa Victoria ka qenë aktive vetëm në rrjetet sociale për promovimin e markës së saj dhe sukseset e djemve të tjerë.
Teksa distanca mes Brooklynit dhe familjes së tij duket më e madhe se kurrë, pamjet nga Malibu dërgojnë një mesazh të qartë: pavarësisht furtunës mediatike, Brooklyn Beckham dhe Nicola Peltz duken të vendosur të ecin përpara, të bashkuar dhe larg dramës familjare.
