Me kalimin e viteve, humbja e peshës, sidomos në zonën e barkut, bëhet gjithnjë e më sfiduese. Pas moshës 50 vjeç, ndryshimet hormonale si ulja e estrogjenit tek gratë dhe testosteronit tek burrat, të kombinuara me një metabolizëm më të ngadaltë, ndikojnë drejtpërdrejt në grumbullimin e yndyrës abdominale.
Kjo yndyrë jo vetëm që është e vështirë për t’u eliminuar, por paraqet edhe rrezik për shëndetin kardiovaskular dhe metabolik.
Gjatë menopauzës dhe andropauzës, trupi ndryshon mënyrën se si shpërndan yndyrën. Në të njëjtën kohë, masa muskulore bie, çka do të thotë se digjen më pak kalori edhe në gjendje pushimi.
Nëse zakonet ushqimore mbeten të njëjta, shtimi në peshë bëhet pothuajse i pashmangshëm.
Ekspertët theksojnë se përveç aktivitetit fizik të rregullt, roli i dietës është vendimtar. Zgjedhja e ushqimeve të pasura me fibra, proteina cilësore dhe yndyrna të shëndetshme ndihmon në përshpejtimin e metabolizmit dhe në kontrollin e oreksit.
Një nga ushqimet që po merr gjithnjë e më shumë vëmendje është amaranti. I konsideruar shpesh si drith, edhe pse teknikisht nuk është i tillë, amaranti është i pasur me proteina, fibra dhe antioksidantë.
Kjo bimë me origjinë nga Amerika Qendrore dhe Jugore rrit ndjesinë e ngopjes, përmirëson tretjen dhe ndihmon në stabilizimin e nivelit të sheqerit në gjak, duke shmangur rritjet e menjëhershme të insulinës që favorizojnë depozitimin e yndyrës në bark.
Farat e vogla të amarantit përmbajnë gjithashtu minerale të rëndësishme si magnezi dhe hekuri, ndërsa përmbajtja e lartë e fibrave të tretshme ndihmon në uljen e përthithjes së yndyrnave dhe në menaxhimin më të mirë të peshës trupore.
Një tjetër avantazh është fakti që amaranti nuk përmban gluten, duke e bërë të përshtatshëm për personat me intolerancë apo për ata që kërkojnë alternativa më të shëndetshme të karbohidrateve.
Përfshirja e tij në dietë është e thjeshtë: mund të zihet si orizi apo quinoa për rreth 20 minuta dhe të kombinohet me perime, mish të ligët ose sallata.
Mielli i amarantit mund të përdoret për bukë, petulla apo krepa, ndërsa farat mund të shpërthehen si kokoshka dhe të shtohen në kos, smoothie apo drithëra mëngjesi.
Nëse barku pas të 50-ave duket më “kokëfortë” se kurrë, ndoshta është momenti të rishikoni jo vetëm stërvitjen, por edhe atë që vendosni në pjatë.
