Një studim i ri ndërkombëtar sugjeron se puna nga shtëpia mund të ketë ndikim të drejtpërdrejtë në jetën familjare dhe në normat e lindshmërisë. Hulumtimi, i cili përfshin 38 vende përfshirë shtete evropiane, tregon se çiftet që punojnë nga distanca të paktën një ditë në javë kanë prirje më të lartë për të pasur fëmijë krahasuar me ata që punojnë vetëm në zyra apo në terren.
Sipas të dhënave, fertiliteti i realizuar dhe i planifikuar rritet mesatarisht me 0.32 fëmijë për grua kur të dy partnerët punojnë nga shtëpia të paktën një herë në javë. Në Shtetet e Bashkuara të Amerikës kjo rritje arrin deri në 0.45 fëmijë për grua, duke treguar një lidhje më të fortë mes fleksibilitetit të punës dhe vendimeve familjare.
Studimi, i udhëhequr nga ekonomisti Steven J. Davis dhe i publikuar nga National Bureau of Economic Research, analizon të dhëna nga persona të moshës 20 deri në 45 vjeç. Ai përfshin si numrin e fëmijëve të lindur, ashtu edhe planet e ardhshme për familje, duke ofruar një panoramë të plotë të fertilitetit gjatë jetës.
Të dhënat tregojnë se në rastet kur asnjëri nga partnerët nuk punon nga shtëpia, numri mesatar i fëmijëve është rreth 2.26 për grua. Kur gruaja punon nga distanca të paktën një ditë në javë, ky numër rritet në 2.48. Nëse të dy partnerët punojnë nga shtëpia, shifra arrin deri në 2.58 fëmijë për grua.
Interesant është fakti se kur vetëm burri punon nga shtëpia, rritja është më e vogël, duke arritur rreth 2.36 fëmijë për grua. Kjo sugjeron se fleksibiliteti i gruas në punë mund të ketë ndikim më të madh në vendimet për krijimin e familjes.Ekspertët theksojnë se:
Një nga arsyet kryesore mund të jetë përmirësimi i balancës mes jetës profesionale dhe asaj personale. Puna nga shtëpia redukton kohën e udhëtimit, rrit praninë në familje dhe ul stresin e përditshëm, faktorë që ndikojnë në vendimet afatgjata për lindjen e fëmijëve.
Megjithatë, studiuesit theksojnë se këto janë lidhje statistikore dhe jo domosdoshmërisht shkak-pasojë e drejtpërdrejtë. Faktorë të tjerë socialë dhe ekonomikë gjithashtu luajnë rol të rëndësishëm në normat e fertilitetit në vende të ndryshme.
