Përmes një urdhri ekzekutiv, në ditën e parë në detyrë, presidenti Donald Trump fali 1,500 persona të dënuar për akuzat që lidhen me sulmin e 6 janarit 2021 ndaj Kapitolit, duke përmbushur një premtim të përmendur shpesh gjatë fushatës presidenciale 2024. Gjatë një ceremonie të nënshkrimit të urdhrave ekzekutivë në zyrën ovale të Shtëpisë së Bardhë, Trump u shpreh se ka ulur dënimet për 14 të dënuar për veprime të dhunshme gjatë sulmit ndaj Kapitolit.
Udhëheqësit e organizatave të ekstremit të djathtë “Proud Boys” dhe “Oath Keepers” janë ndër ata që po vuajnë dënime me burg për rolin e tyre në veprimet e dhunshme në Kapitol. Mbi 600 persona u akuzuan për sulm ose pengim të policisë gjatë protestës së dhunshme, sipas të dhënave të Departamentit të Drejtësisë.
Presidenti Trump ishte zotuar të falte shumë prej të akuzuarve, duke argumentuar se ata ishin trajtuar në mënyrë të padrejtë nga sistemi ligjor.
Më pas, ai firmosi urdhra ekzekutivë mbi çështje të ndryshme, përfshirë emigracionin, kufirin SHBA-Meksikë, qeverinë federale dhe çështje të tjera. Më herët, pas një fjalimi para mbështetësve të tij në sallën e sportit “Capital One Arena” në Uashington, presidenti Trump anuloi 78 urdhra ekzekutivë të adminstratës së mëparshme.
Në mesin e 9 urdhrave ekzekutivë të presidentit Trump është tërheqja e Shteteve të Bashkuara nga Marrëveshja e Parisit për Klimën, e kritikuar gjerësisht nga republikanët. Presidenti Trump dhe ligjvënësit republikanë i kanë kritikuar politikat e administratës Biden për ndryshimet klimatike, si veprime që dëmtojnë bizneset dhe ekonominë amerikane.
Presidenti Trump, gjithashtu nënshkroi një urdhër për pezullimin e përkohshëm të punësimeve të reja në qeverinë federale me përjashtim të ushtrisë, si dhe një dekret tjetër për të pezulluar përkohësisht miratimin e rregullave të reja federale nga agjencitë qeveritare. Republikanët dhe presidenti Donald Trump kanë kritikuar rregullat e tepërta të qeverisë federale, duke thënë se ato po cënojnë bizneset e po pengojnë zhvillimin ekonomik të vendit.
