Duka i Sussex, Princi Harry, ka shprehur dëshirën për pajtim me Familjen Mbretërore, gjatë një interviste emocionale për BBC, ku rrëfeu zhgënjimin e thellë pas humbjes së apelimit në gjykatë lidhur me të drejtën për siguri gjatë qëndrimeve në Mbretërinë e Bashkuar.
Do të doja shumë një pajtim me familjen time. Nuk ka kuptim të vazhdojmë të luftojmë më, jeta është e çmuar
– tha ai, duke shtuar se ishte “i shkatërruar” nga vendimi i gjykatës që i mohoi mbrojtjen automatike të sigurisë.
Sipas Princit Harry, çështja e sigurisë ka qenë gjithmonë “pika e ngërçit” mes tij dhe Familjes Mbretërore. Ai deklaroi se Mbreti Charles “nuk do të flasë me mua për shkak të këtyre çështjeve” dhe shtoi me dhimbje:
Nuk e di sa kohë do të ketë babai im.
Pallati i Buckingham reagoi duke thënë se:
Të gjitha këto çështje janë shqyrtuar në mënyrë të përsëritur dhe me kujdes nga gjykatat
– duke theksuar se vendimet kanë qenë të njëjta në çdo rast.
Ai pranoi se mund të kthehet i sigurt në Britani vetëm nëse ftohet nga Familja Mbretërore, çka do t’i siguronte mbrojtje të mjaftueshme.
Duke folur për dashurinë ndaj vendit të tij, Princi Harry shtoi:
E dua vendin tim, gjithmonë e kam dashur, pavarësisht asaj që kanë bërë disa njerëz në atë vend… dhe është vërtet shumë e trishtueshme që nuk do të jem në gjendje t’u tregoj fëmijëve të mi atdheun tim.
