Shumë pronarë qensh shpesh ndjejnë se kafshët e tyre shtëpiake reflektojnë gjestet, humorin dhe zakonet e tyre. Sipas hulumtimeve të fundit, kjo nuk është vetëm përshtypje – qentë vërtet vëzhgojnë dhe mësojnë duke imituar sjelljet e njerëzve me të cilët jetojnë.
Studiuesja Claudia Fugazza ka zhvilluar një metodë trajnimi të quajtur “Bëj siç bëj unë”, e cila mbështetet pikërisht tek aftësia e qenve për të imituar.
Në këtë metodë, qeni shikon trajnerin duke kryer një veprim dhe më pas përpiqet ta përsërisë atë, pa përdorur ushqime si shpërblim.
Ekspertët shpjegojnë se kjo ndodh edhe në jetën e përditshme. Qentë kalojnë ditë, muaj dhe vite duke vëzhguar pronarët e tyre dhe përvetësojnë si zakone të mira, ashtu edhe të këqija. Për shembull:
-Nëse punoni në kopsht duke gërmuar, qeni mund të nisë të bëjë të njëjtën gjë.
-Nëse hapni shpesh dollapët e kuzhinës, ai mund të përpiqet t’i hapë edhe vetë.
-Nëse kaloni shumë kohë ulur dhe shmangni aktivitetin fizik, qeni përshtatet me këtë ritëm dhe bëhet më pasiv.
Përveç zakoneve, qentë janë tepër të ndjeshëm edhe ndaj emocioneve njerëzore. Studimet tregojnë se nivelet e hormoneve të stresit tek qentë shpesh përputhen me ato të pronarëve të tyre.
Nëse jeni të gëzuar, të trishtuar ose të shqetësuar, qeni mund t’i pasqyrojë këto ndjenja.
Ekspertët paralajmërojnë gjithashtu se qentë që nuk mësojnë të qëndrojnë vetëm mund të zhvillojnë ankth ndarjeje. Nëse ata janë gjithmonë me pronarët dhe nuk mësohen të menaxhojnë vetminë, lënia vetëm mund të shkaktojë stres të lartë dhe madje sulme paniku.
Ky studim nënvizon rëndësinë e ndërveprimeve të shëndetshme dhe të balancuara me qentë, për të ndikuar pozitivisht si në sjelljen, ashtu edhe në mirëqenien e tyre emocionale.
