Rihanna dhe partneri i saj ASAP Rocky janë parë së fundmi në New York City nën masa të rrepta sigurie, pas incidentit tronditës me të shtëna në shtëpinë e këngëtares në Los Angeles.
Çifti u filmua duke dalë nga një ndërtesë në Manhattan, i shoqëruar nga rreth gjashtë truproja që i rrethonin nga të gjitha anët. Sipas dëshmitarëve, ata u larguan me shpejtësi drejt një automjeti, duke shmangur çdo kontakt me publikun.
Kjo është paraqitja e tyre e parë publike pas ngjarjes së rëndë të së dielës, kur një grua hapi zjarr drejt banesës së artistes në Beverly Hills.
Në momentin e sulmit, Rihanna, ASAP Rocky dhe fëmijët e tyre ndodheshin brenda shtëpisë.
Autoritetet kanë arrestuar Ivanna Lisette Ortiz, e cila përballet me akuza të rënda, përfshirë tentativë vrasjeje, disa akuza për sulm me armë zjarri dhe të shtëna ndaj një ndërtese të banuar dhe një automjeti. Për lirimin e saj është vendosur një garanci mbi 10 milionë dollarë.
Ngjarja është dokumentuar edhe përmes një telefonate në 911, ku sipas raportimeve janë dëgjuar të shtëna të shumta, ndërsa policia konfirmon se këngëtarja ndodhej në banesë në momentin e incidentit.
Pas kësaj ngjarjeje, duket se masat e sigurisë për Rihanna janë rritur ndjeshëm, ndërsa çifti po tregohet më i kujdesshëm në daljet publike.
