Ryan Gosling ka bërë një rrëfim të rrallë për dy vajzat e tij, duke treguar se ato kanë pasur një rol të veçantë në filmin e tij më të ri, Project Hail Mary.
Aktori 45-vjeçar luan në filmin fantastiko-shkencor ku portretizon një mësues që bashkëpunon me një alien të quajtur Rocky për të shpëtuar planetët e tyre. Por për Gosling, ky projekt ka një domethënie shumë më personale.
E bëra në thelb për to
-tha ai për Access, duke iu referuar vajzave të tij Esmeralda, 11 vjeç, dhe Amada, 9 vjeç, që i ndan me partneren e tij prej vitesh, Eva Mendes.
Si familje, do të doja një film të tillë që ta shihnim bashkë.
Madje, vajzat nuk janë thjesht spektatore, ato kanë parë disa versione të filmit dhe i kanë dhënë “shënime” babait të tyre.
Janë të vetmet kritika që më interesojnë. Janë shumë kritike dhe shumë të sinqerta
-u shpreh ai me humor.
Gosling dhe Mendes u njohën në xhirimet e filmit The Place Beyond the Pines në vitin 2012 dhe prej atëherë kanë ndërtuar një jetë larg vëmendjes së tepruar mediatike.
Aktori ka treguar më parë se nuk e kishte menduar të bëhej baba para se të njihte Evën.
Nuk doja të kisha fëmijë pa të
-ka thënë ai në një intervistë për GQ.
Çifti njihet për ndarjen e përgjegjësive familjare: kur njëri punon, tjetri qëndron me vajzat. Gosling madje e quan Mendes “trajneren më të mirë të aktrimit” që ka pasur ndonjëherë.
Së fundmi, familja është zhvendosur përkohësisht në Londër për shkak të angazhimeve filmike të aktorit, duke shijuar një jetë më të qetë larg Hollywood-it.
Ndërkohë, në Ditën e Shën Valentinit, Eva promovoi filmin e ri të partnerit të saj në mënyrë plot stil, duke postuar foto me një bluzë ku shkruhej “Believe in the Hail Mary” dhe duke e dedikuar postimin “Për Valentinin tim”.
Me sa duket, për Ryan Gosling, suksesi më i madh nuk matet me para, por me buzëqeshjen dhe miratimin e dy vajzave të tij.
