Kategoria Superiore luajti sot javën e parafundit të saj, me ndeshje të cilat prodhuan në total vetëm 5 gola. Spikasin fitoret e arta të Bylisit, Teutës dhe Laçit, ndërkohë që dueli mes Elbasanit dhe Vllaznisë dhe Egnatia-Skënderbeu u mbyllën pa fitues.
Duket se verdiktet përfundimtare do të mësohen javën e fundit, teksa Teuta tashmë ka shpëtuar edhe matematikisht sezonin, pas triumfit në kryeqytet.
Në ‘Arenën Kombëtare’ Tirana vendase humbi 0-1 me Teutën dhe komplikon llogaritë për mbijetesën. Klubi më i titulluar në Shqipëri ndodhet në vendin e parafundit me 36 pikë dhe javën e ardhshme luan kundër Dinamos. Në kryeqytet vendosi goli i një ish-i si Mario Beshiraj.
Në Ballsh, Bylisi mposhti 1-0 Partizanin duke i nxjerrë ‘Demat’ nga zona e ‘Final 4’. Djemtë vendas morën tri pikë me vlerë në garën e mbijetesës. Ndërkohë, AF Elbasani barazoi 1-1 me Vllazninë dhe me këtë pikë AF Elbasani ndodhet për momentin në vendin e katërt, teksa java e fundit sheh ‘finalen’ me Partizanin. Do jetë përballja direkte mes tyre që do përcaktojë skuadrën e katërt që do garojë për trofeun.
Në Laç vendasit e shumë problemeve mposhtën 1-0 Dinamon me golin e Cordeiros. Ndërkohë që në Rrogozhinë Egnatia dhe Skënderbeu barazuan pa gola.
Sa i takon renditjes, Egnatia ka siguruar vendin e parë, ndërsa në ‘Final 4’ një biletë ka edhe për Vllazninë dhe Dinamon. Sa i takon zonës së ftohtë, Teuta ka shmangur rënien direkte, teksa garë për mbijetesën në javën e fundit do kenë Bylis, Skënderbeu, Tirana dhe Laçi.
KATEGORIA SUPERIORE
JAVA 35
BYLIS 1–0 PARTIZANI
EGNATIA 0–0 SKËNDERBEU
TIRANA 0–1 TEUTA
LAÇI 1–0 DINAMO
ELBASANI 1–1 VLLAZNIA
Renditja e Kategorisë Superiore ka pësuar ndryshime të rëndësishme para javës së fundit të saj, falë rezultateve të ndeshjeve të javës së 35-të.
Ajo që bie në sy në pejsën e sipërme të klasifikimit është ndryshimi i vendeve mes Vllaznisë dhe Dinamos, si dhe i Elbasanit me Partizanin, pasi tani janë verdheblutë që ngjiten të katërtit në zonën e katërshes që lufton për titullin.
Gjithçka është e hapur në Superiore dhe do të vendoset në javën e fundit. Nga vendi i parë dhe deri te i fundit mund të ketë rotacion.
Të pesta ndeshjet e javës së 36-të do të luhen të dielën e ardhshme. Kështu më 27 prill do të ndahen verdiktet.
Derbi Dinamo-Tirana dhe sfida mes Partizanit dhe Elbasanit janë ndër duelet më interesante. Sigurisht që një tjetër ndeshje, Skënderbeu-Bylis, do të ketë vëmendjen e të gjithëve.
JAVA E 36 E SUPERIORES
E diel, ora 15:30
Vllaznia – Laçi
Dinamo – Tirana
Teuta – Egnatia
Skënderbeu – Bylis
Partizani — Elbasani
