Mel Brooks ka mbushur 99 vjeç, por energjia dhe humori i tij mbeten po aq të gjalla sa filmat që e bënë legjendë. Fitues i çmimeve EGOT dhe krijues i klasikëve si The Producers dhe Blazing Saddles, Brooks beson se jetëgjatësia e tij nuk është aspak rastësi, por rezultat i një “recete” shumë të thjeshtë: të qeshurit.
Nuk është mister. Ne qeshnim shumë
-ka treguar ai për PEOPLE, duke përmendur edhe miqtë e tij të ngushtë, Carl Reiner dhe Sid Caesar, të cilët gjithashtu jetuan deri në moshë shumë të thyer.
Sipas Brooks, qeshja jo vetëm që të mban të shëndetshëm, por edhe të lumtur.
Me një karrierë që shtrihet për gati tetë dekada, Mel Brooks e ka ndërtuar jetën e tij duke u dhënë gëzim të tjerëve. Dokumentari i ri dy-pjesësh i HBO-së, Mel Brooks: The 99-Year-Old Man!, sjell intervista me vetë komedianin, familjarët dhe pamje arkivore, duke ofruar një pasqyrë të plotë të jetës dhe trashëgimisë së tij artistike.
Është një ndjesi magjike të shohësh njerëzit duke qeshur me atë që kam krijuar
-thotë Brooks, duke pranuar se kjo ka qenë gjithmonë forca e tij më e madhe.
Ai thekson gjithashtu se guximi ka qenë një tjetër faktor kyç në suksesin e tij, një tipar që e trashëgoi nga nëna e tij, e cila rriti katër djem e vetme pas humbjes së bashkëshortit.
Gjatë Luftës së Dytë Botërore, humori dhe batutat me shokët e ushtrisë e ndihmuan të përballonte situatat më të vështira.
Pas luftës, Brooks ndërtoi një nga karrierat më të ndikueshme në historinë e komedisë, duke fituar Oscar dhe duke krijuar filma e seriale që vazhdojnë të frymëzojnë breza të tërë. Miqtë dhe bashkëpunëtorët e tij e quajnë një “thesar kombëtar” dhe “gur themeli të komedisë moderne”.
Dokumentari Mel Brooks: The 99-Year-Old Man! nis transmetimin më 22 janar në HBO Max, duke festuar jetën e jashtëzakonshme të një prej figurave më ikonike të humorit botëror.
