Shakira do të rikthehet në një nga skenat më spektakolare në botë. Këngëtarja kolumbiane do të mbajë një koncert në Piramidat e Mëdha të Gizës më 28 nëntor, duke u rikthyer në këtë vend ikonik pothuajse dy dekada pas performancës së saj të parë.
Artistja kishte kënduar në të njëjtin vend në vitin 2007 gjatë turneut “Oral Fixation”, ndërsa këtë herë koncerti do të jetë pjesë e turneut të saj botëror “Las Mujeres Ya No Lloran”.
Fillimisht, performanca ishte planifikuar të mbahej më 7 prill, por organizatorët vendosën ta shtynin për në nëntor për shkak të asaj që e përshkruan si “situata në rajon”, pas konfliktit mes SHBA-së, Izraelit dhe Iranit.
Duke njoftuar rikthimin në Egjipt, Shakira u shpreh e emocionuar përmes një mesazhi për fansat:
Jam shumë e lumtur që do të performoj në Egjipt, në piramidat e Gizës. Ju dua të gjithëve.
Koncerti organizohet nga Venture Lifestyle, kompania që ka sjellë më parë në të njëjtën skenë emra të mëdhenj të muzikës botërore si Jennifer Lopez, John Legend dhe Katy Perry.
Rikthimi në Egjipt vjen pas një vere të ngarkuar për Shakirën. Muajin e kaluar ajo performoi në ceremoninë e hapjes së Kupës së Botës 2026 në Mexico City, ku interpretoi himnin zyrtar “Dai Dai” së bashku me Burna Boy dhe J Balvin.
Sipas organizatorëve, të ardhurat nga kjo këngë do t’i kalojnë Fondit Global të Arsimit Qytetar të FIFA-s, ndërsa 500 mijë dollarë do të përdoren për të mbështetur arsimimin e fëmijëve të prekur nga tërmetet e fundit shkatërruese në Venezuelë.
