Deputetja e Partisë Demokratike, Jorida Tabaku, reagoi sot për miratimin e raportit për Shqipërinë në Komisioni i Punëve të Jashtme i Parlamentit Europian (AFET).
Ligjvënësja opozitare e cilëson këtë raport si “një pasqyrë reale të situatës në vend dhe një moment reflektimi për rrugën europiane”, pasi “Shqipëria ndodhet në udhëkryq”.
Sipas Tabakut, raporti thekson se:
“Rruga europiane e vendit kalon përmes zgjedhjeve të lira dhe të ndershme, duke vendosur në qendër nevojën për një reformë zgjedhore gjithëpërfshirëse dhe mbi të gjitha për vullnet politik real që garanton standardet demokratike”.
Nëpërmjet një video-mesazhi në rrjetet sociale, Tabaku falënderoi drejtuesit e këtij procesi, përfshirë David McAllister, raporterin Andreas Schieder dhe bashkëraporterin Andrey Kovatchev, për analizën e thelluar mbi zhvillimet në Shqipëri.
Një tjetër element kyç, sipas saj, është funksionimi i institucioneve. Tabaku flet për rëndësinë e pavarësisë së parlamentit dhe të Gjykata Kushtetuese e Shqipërisë, si dhe zbatimin e vendimeve të saj.
“Roli i opozitës dhe barazia para ligjit janë thelbësore për një demokraci funksionale”, tha ajo.
Në reagimin e saj, deputetja e PD ndalet edhe tek shqetësimet për lirinë e medias, duke theksuar se “raporti evidenton sulmet ndaj gazetarëve, mungesën e pavarësisë së mediave dhe përdorimin e padive strategjike (SLAPP) si instrument presioni ndaj tyre”.
“Raporti i AFET vendos theksin tek cilësia e legjislacionit, proceset konsultative dhe nevoja për përfshirje më të gjerë të aktorëve në procesin e integrimit”, tha ajo, duke e cilësuar këtë të fundit si “një proces që duhet t’u shërbejë qytetarëve dhe jo propagandës politike”.
Në përfundim, ajo u shpreh se raporti duhet të lexohet si një plan pune për Shqipërinë dhe jo si një instrument komunikimi ditor nga qeveria.
“Vendi ka nevojë më shumë se kurrë për besimin dhe shpresën që ofron procesi i integrimit europian”, përfundon deputetja demokrate.
