Sipas rezultateve paraprake zyrtare, Sinisa Karan, kandidati i partisë nacionaliste serbe SNSD në pushtet, ka fituar zgjedhjet e parakohshme për president të Republika Srpska-s (RS), entitetit serb brenda Bosnjë-Hercegovinës.
Karan mori 200 116 vota ose 50,85%, duke mposhtur rivalin e opozitës, Branko Blanusa, profesor elektronike nga SDS-ja opozitare, i cili siguroi 188 010 vota (47,8%), siç njoftoi Komisioni Qendror Zgjedhor në Sarajevë pas numërimit të votave në 92,79% të qendrave të votimit.
Karan shihet si aleat i ngushtë i ish-presidentit Milorad Dodik, i cili u shkarkua nga posti për aktivitete separatiste, pas një vendimi gjyqësor, zhvillim që çoi në organizimin e zgjedhjeve të parakohshme të një dite më parë.
Rreth 1,2 milion persona kishin të drejtë vote, por pjesëmarrja ra në rreth 35%, nga 53% në vitin 2022. Si zgjedhje të parakohshme, mandati i ri presidencial do të zgjasë vetëm një vit dhe shihet si provë para zgjedhjeve parlamentare dhe presidenciale të vitit 2026.
Karan falënderoi votuesit e drejtuesin e tij politik, Dodik.
Kur ishte më e vështira, populli serb triumfoi… Faleminderit Milorad Dodik dhe të gjithë deputetëve që mbrojtën Republika Srpska!
Vëzhguesit politikë nuk presin që Karan të vazhdojë axhendën separatiste të Dodikut. Gjatë mandatit, Dodik ka ruajtur marrëdhënie të mira me Moskën dhe pritet që të vazhdojë të udhëheqë partinë SNSD, pavarësisht ndalimit për të mbajtur poste publike.
