Festivali i Filmit në Kanë ka ndaluar aktorin francez Theo Navarro-Mussy të shfaqet në tapetin e kuq, pas akuzave për sulm seksual ndaj tij.
Aktori 34-vjeçar luan një rol dytësor si oficer policie në filmin “Dossier 137” të regjisorit Dominik Moll, i cili pritet të shfaqet premierë këtë të enjte në garën zyrtare të festivalit.
Sipas revistës franceze “Télérama”, Navarro-Mussy është akuzuar për përdhunim nga tre ish-partnere, në vitet 2018, 2019 dhe 2020.
Megjithëse çështja është pushuar muajin e kaluar për mungesë provash, drejtori i festivalit, Thierry Frémaux, deklaroi se përjashtimi i aktorit është bërë për shkak të një apeli ende në proces. Ndërkohë, avokati i aktorit ka mohuar se çështja është ende aktive.
Ky vendim shënon një precedent të rëndësishëm për festivalin, i cili tani duket se po ndjek shembullin e çmimeve César në Francë, që prej vitit 2023 përjashtojnë çdo pjesëmarrës nën hetim ose të dënuar për sulm seksual.
Theo Navarro-Mussy, i njohur për rolin e tij në serialin “Hippocrate”, ka mohuar akuzat, por ka pranuar për “Télérama” se e kupton vendimin e organizatorëve të festivalit.
