Leximi, shkrimi dhe mësimi i gjuhëve të huaja mund të ulin rrezikun e demencës me gati 40 për qind, sipas një studimi të ri që sugjeron se miliona njerëz mund ta parandalojnë ose ta vonojnë shfaqjen e kësaj sëmundjeje. Demenca është një nga kërcënimet më të mëdha shëndetësore në botë. Numri i njerëzve që jetojnë me këtë gjendje pritet të trefishohet dhe të kalojë 150 milionë globalisht deri në vitin 2050. Ekspertët paralajmërojnë se kjo paraqet një rrezik të madh dhe në rritje të shpejtë për sistemet shëndetësore dhe sociale në çdo komunitet dhe vend.
Studiues nga Shtetet e Bashkuara zbuluan se përfshirja në aktivitete intelektualisht stimuluese gjatë gjithë jetës, si leximi, shkrimi apo mësimi i një gjuhe të re, lidhet me një rrezik më të ulët për sëmundjen e Alzheimerit, forma më e zakonshme e demencës, si dhe me një rënie më të ngadaltë të aftësive njohëse. Autorja e studimit, Andrea Zammit nga Rush University Medical Center në Chicago, tha se zbulimi tregon se shëndeti kognitiv në moshë të thyer ndikohet “fuqishëm” nga ekspozimi i vazhdueshëm ndaj mjediseve që stimulojnë mendjen gjatë gjithë jetës.
“Sipas gjetjeve tona, angazhimi i rregullt në një sërë aktivitetesh që stimulojnë trurin mund të bëjë diferencë reale për funksionet njohëse. Investimet publike që zgjerojnë qasjen në mjedise pasuruese, si bibliotekat dhe programet e hershme arsimore që nxisin dashurinë për të mësuar gjatë gjithë jetës, mund të ndihmojnë në uljen e rasteve të demencës”, tha ajo.
Studiuesit ndoqën 1,939 persona me moshë mesatare 80 vjeç, të cilët nuk kishin demencë në fillim të studimit. Ata u monitoruan për një periudhë mesatare prej tetë vitesh. Pjesëmarrësit plotësuan pyetësorë mbi aktivitetet njohëse dhe burimet e të mësuarit në tre faza të jetës së tyre, shkruan The Guardian. Pasurimi i hershëm, para moshës 18 vjeç, përfshinte sa shpesh u lexohej, sa shpesh lexonin libra, nëse kishin qasje në gazeta dhe atlase në shtëpi, si dhe nëse kishin mësuar një gjuhë të huaj për më shumë se pesë vjet.
