Aktorja e njohur e serialit “Euphoria”, Sydney Sweeney, po kalon një periudhë të vështirë në karrierën e saj profesionale pas dështimit të dy filmave më të fundit në arkë.
“Eden”, thriller i mbijetesës me regji nga Ron Howard dhe buxhet prej 50 milionë dollarësh, arriti të grumbullojë vetëm 1 milion dollarë në fundjavën e parë të shfaqjes në 664 kinema amerikane.
Filmi, ku Sweeney luan përkrah Ana de Armas dhe Jude Law, ka marrë 55% vlerësime pozitive në “Rotten Tomatoes”.
Ndërkohë, “Americana”, një komedi krimi ku aktorja shfaqet përkrah këngëtares Halsey, debutoi me fitime modeste prej 500 mijë dollarësh kundrejt një buxheti 9 milionësh. Regjisori Tony Tost e ka përshkruar filmin si një “perlë të fshehur” që mund të fitojë më shumë vlerësim me kalimin e kohës.
Këto rezultate vijnë pas polemikave që shoqëruan një reklamë të markës “American Eagle”, ku Sweeney u përfshi në një spot të kritikuar për elemente historike të diskutueshme.
Megjithatë, sondazhet treguan se fushata u prit pozitivisht nga pjesa më e madhe e publikut.
Pavarësisht sfidave të fundit, Sydney Sweeney mbetet një nga aktoret më të kërkuara në Hollywood. Ajo ka përfunduar së fundmi xhirimet për filmin biografik mbi boksieren Christy Martin, ndërsa këtë verë do të nisë punën si producente dhe aktore në projektin “Scandalous!”.
Në listën e saj të ardhshme përfshihen gjithashtu thrilleri “I Pretended to Be a Missing Girl”, një film sci-fi për “Amazon MGM” dhe adaptimi i videolojës së njohur “OutRun” nga regjisori Michael Bay.
