Shkencëtarët kanë regjistruar dridhje sizmike në fitoren e Liverpool 5-1 kundër Tottenham të dielën e kaluar, e cila riktheu pas pesë vitesh titullin kampion në “Anfield”. Festimet e tifozëve pas golit të Alexis Mac Allister shkaktuan dridhje me magnitudë maksimale prej 1.74 ballë të shkallës Rihter.
Studiues nga departamenti i shkencave të Tokës, oqeanit dhe mjedisit në Universitetin e Liverpulit ishin në vendngjarje të dielën e kaluar për të matur lëvizjen e tokës nga tifozët gjatë gjithë ndeshjes kur skuadra e Liverpool fitoi 5-1 dhe mori titullin e Premier League për sezonin 2024-25.
Duke përdorur pajisje sizmike të teknologjisë së fundit, të njëjtin lloj instrumentesh të përdorura për të monitoruar rajone të prirura ndaj tërmeteve si Kili dhe Italia, shkencëtarët kapën lëvizjet e tokës të shkaktuara nga festimet.
LEXO EDHE: Liverpuli 20 herë kampion, Arne Slot futet në histori, Mohamed Salah rekordmen
Të dhënat zbuluan se tifozët prej 60,415 personash gjeneruan një aktivitet të vërtetë sizmik, veçanërisht pas gjashtë golave të shënuar gjatë ndeshjes.
Dridhja më e fortë u shkaktua pas golit të Alexis Mac Allister në minutën e 24-t, i cili e çoi Liverpoolin në epërsi 2-1. Ajo regjistroi një magnitudë maksimale prej 1.74 ballë sipas shkallës Rihter.
Lëkundja e dytë më e fortë, me magnitudë 1.60, u regjistrua kur Salah shënoi (4-1). Goli i Gakpo (3-1) ishte 1.03 ballë, autogoli i Udogie (5-1) ishte 1.35 ballë, ndërsa goli i Luis Diaz nuk e emocionoi shumë Anfieldin; magnitudë 0.64.
Doktor Farnaz Kamranzad, i cili mori pjesë në studim komentoi: “Është e mahnitshme të shohësh se si tifozët e futbollit mund të gjenerojnë energji sizmike. Shkenca është kudo, madje edhe e fshehur nën zhurmën e një goli në ‘Anfield’. Çdo duartrokitje, çdo festë, lë një gjurmë nën këmbët tona, një gjurmë sizmike gëzimi kolektiv, e shkruar në kujtesën e Tokës…”.
