Donald Trump ka reaguar për imazhin kontrovers të publikuar më herët gjatë së hënës në rrjetin Truth Social, i cili u interpretua si një paraqitje e tij në formë të ngjashme me Krishtin.
Gjatë një deklarate për mediat, Trump sqaroi se fotoja – e cila më pas është fshirë – nuk kishte lidhje me figurën e Jezusit.
Sipas tij, imazhi e paraqiste si një “doktor që i bën njerëzit më mirë”, dhe jo si një figurë fetare.
Ai hodhi poshtë interpretimet që qarkulluan në media, duke i akuzuar ato se e kanë “shpikur” këtë narrativë.
Në imazh, Trump shfaqet i veshur me rrobë të kuqe dhe të bardhë, me dorën e vendosur mbi ballin e një burri të sëmurë, ndërsa nga ana tjetër përshkruhet një dritë “hyjnore” që buron mbi skenë, njësoj si imazhet e Krishtit. Ai rrethohet nga figura si mjekë, ushtarë dhe persona që paraqiten në qëndrim adhurues.
Në sfond shfaqen elementë simbolikë si flamuri amerikan, një shqiponjë dhe Statuja e Lirisë.
