Dëgjo live TOP ALBANIA RADIO
Dëgjo live TOP GOLD RADIO
Dëgjo live MY MUSIC RADIO
Voto në THE TOP LIST
Ndryshe Showbiz

Pas shumë puntatash në “Ndryshe”, ndahen Paloma dhe Salsano!

Këtë herë në emisionin “Ndryshe” të gjithë ju do të keni një episod ndryshe. Jemi mësuar tashmë që çdo të martë në mbrëmje të dëgjojmë e të shohim dy folësit tanë Paloma e Salsano krah për krah duke intervistuar e ‘ngacmuar’ të ftuarit e tyre. Ata na sjellin gjithmonë energji dhe të qeshura pa fund dhe nuk mund t’a mendojmë këtë program radiofonik pa ata të dy. Pasi sollën për të gjithë ne dhe barcaletën e javës që u pëlqye kaq shumë nga dëgjuesit tanë dhe të gjithë ata që na ndjekin online në YouTube e platforma sociale, Paloma dhe Salsano ndahen!

Megjithatë nuk duhet t’ju kapë paniku. Kjo ndarje megjithëse e para për këtë sezon të “Ndryshe” vjen për një arsye shumë të fortë që dhe na trishton disi. Duke qenë se folësja e hershme e Top Albania Radio është infektuar nga COVID-19, ajo është izoluar dhe po vazhdon trajtimin në shtëpi sipas protokollit të lëshuar nga Ministria e Shëndetësisë. Për të gjithë ata që e duan shumë dhe mezi presin që Paloma të kthehet në studion e TAR, duhet t’ju themi se gjendja e saj është e mirë dhe ajo pret me padurim të rikthehet në krye të detyrës.

Sakaq, episodi i sotëm nuk e gjen Salsanon vetëm. Pranë tij në bashkëmoderim do të jetë kolegia e spektaklit të humorit “Portokalli”, Arjola Demiri dhe nga ana tjetër e studios si gjithmonë do të gjendet Dj Vini. “Ndryshe” vjen dhe me të tjerë të ftuar këtë mbrëmje, këngëtaren shkodrane me zërin e ëmbël Rosela Gjylbegu dhe botuesja e shkrimtarja e njohur Flutura Açka. Gjithçka nis në orën 18:00, mos e humbisni!