Rusia lëshoi 16 dronë kamikazë në Ukrainë, një ditë pas dhjetëra raketave kundër infrastrukturës ukrainase. Këta dronë nga juglindja dhe veriu, u shkatërruan nga mbrojtja ajrore. Kryebashkiaku i Kievit, Vitali Klitschko tha se shtatë prej tyre ishin drejtuar për në kryeqytet. Pesë u shkatërruan brenda Kievit dhe dy, para se të arrinin shënjestrën.
Një ndërtesë administrative në Kiev u shkatërrua pjesërisht, sipas kreut të administratës ushtarake, Serhiy Popko, ndërsa tha se nuk ka informacione për viktima. Nga mesi i tetorit, Rusia ka nisur disa valë sulmesh me dronë e raketa kundër Ukrainës, duke i dëmtuar rëndë infrastrukturën energjetike.
Sekretari i Përgjithshëm i NATO-s, Jens Stoltenberg u bëri thirrje vendeve anëtare të Aleancës, të furnizojnë me më shumë armë Ukrainën.
I bëj thirrje aleatëve, të bëjnë më shumë! Eshtë në të gjitha interesat tona të sigurisë që Ukraina të mbizotërojë dhe presidenti rus Vladimir Putin të mos fitojë! Ndoshta edhe më e rëndësishme është që Ukraina të marrë municion të mjaftueshëm për sistemet tashmë të vendosura. Nevoja për municion dhe pjesë këmbimi është shumë e madhe.
Në një fjalim para një grupi liderësh perëndimorë, javën e kaluar, presidenti ukrainas, Volodymyr Zelenskiy kërkoi një gamë të gjerë armësh e sistemesh të mbrojtjes ajrore për të ndihmuar përpjekjet për të kundërshtuar pushtimin rus.
Gjithashtu, Shtetet e Bashkuara të Amerikës njoftuan gati 2 miliardë dollarë ndihmë ushtarake shtesë, duke përfshirë Sistemin e Mbrojtjes Ajrore Patriot, i cili ofron mbrojtje kundër avionëve, raketave lundruese e balistike.
Mbështetja ushtarake për Ukrainën është rruga më e shpejtë drejt paqes. Ne e dimë se shumica e luftërave përfundojnë në tryezën e bisedimeve, ndoshta edhe kjo luftë. Por, ne e dimë se ajo që mund të arrijë Ukraina në këto negociata varet pazgjidhshmërisht nga situata ushtarake.
Rusia pushtoi Ukrainën më 24 shkurt në atë që Putin e quan “operacion special ushtarak” kundër asaj që e percepton si “kërcënim për sigurinë ruse”. Ukraina dhe aleatët perëndimorë kanë denoncuar veprimet e Rusisë si një rrëmbim toke të stilit imperialist dhe i vunë sanksione në përpjekje për të ndërprerë fushatën. Lufta 11-mujore ka vrarë dhjetëra mijëra njerëz, dëboi miliona nga shtëpitë e tyre, la qytete në gërmadha e ka tronditur ekonominë globale, duke rritur çmimet e energjisë dhe ushqimeve.