Me flamuj të Izraelit, me mijëra izraelitë vazhduan protestat në mbarë vendin edhe dje në mbrëmje, pas një jave trazirash të shkaktuara nga miratimi i një pakete ligjore që kufizon pushtetin e Gjykatës së Lartë në shtetin hebraik.
Nga kodrat e Galilesë veriore deri te rrugët që përshkojnë qendrën financiare të Tel Avivit, protestuesit, duke u rënë daulleve dhe borive dolën në rrugë gjatë mbrëmjes duke sfiduar temperaturat e larta të kësaj vere.
Ndryshimet në gjyqësor të qeverisë së djathtë të kryeministrit Benjamin Netanyahu, pjesa e parë e së cilave u miratua këtë fillimjave, ka krijuar një krizë të paprecedentë dhe një përçarje të thellë shoqërore. Kjo është java e 30-të e protestave.
Ndër të tjera, plani i qeverisë ka tronditur përkushtimin e rezervistëve të ushtrisë, ndërsa ka nxitur dhe paralajmërime të rrepta për pasojat ekonomike.
Disa organizata i bënë thirrje Gjykatës së Lartë për të shfuqizuar ligjin e ri, i cili i heq autoritetin vetë kësaj gjykate për të anuluar ato që i konsideron vendime jo të arsyeshme nga qeveria dhe ministrat. Gjykata tha se do të dëgjojë argumentet në muajin shtator, duke krijuar mundësinë për një përballje kushtetuese.
Nga tjetër, shefi i qeverisë, Netanyahu është përpjekur të minimizojë ndikimin e ligjit të ri, i miratuar pas disa ditësh debati të ashpër e me tone të larta në parlament, në një votim që u bojkotua nga opozita. Ky është një nga disa ndryshimet që qeveria e tij thotë se janë të nevojshme për të balancuar degët e ekzekutivit.
Kritikët thonë se ai po kërcënon parimet demokratike të Izraelit, si dhe pavarësinë e gjykatave, duke nënvizuar se kjo mund të ketë lidhje edhe me një çështje me dyshimin për korrupsion me të cilin po përballet vetë Netanyahu. Ai e mohon këtë dhe po ashtu ka hedhur poshtë akuzën për korrupsion kundër tij.
