Në orën 20:00, në “Arenën Kombëtare”, sonte luhet gjysmëfinalja e parë e fazës “Final 4” të “Abissnet Superiore”-s, mes Vllaznisë e Dinamo City-t. Kjo është një përballje vendimtare, që pritet të përcaktojë skuadrën e parë finaliste të këtij sezoni në kampionatin elitar të futbollit shqiptar. Vllaznia e nis ndeshjen në pozita më të favorshme, pasi kualifikohet edhe në rast barazimi, ndërsa Dinamo City-t i duhet me patjetër fitorja për të kaluar në finale.
Sa i përket Dinamo City-t, tre ditë më parë fitoi trofeun e Kupës së Shqipërisë, pasi mundi Egnatian në një ndeshje spektakolare në “Elbasan Arena” që u vendos vetëm nga penalltitë, pasi koha e rregullt u mbyll në barazim 2-2. Në shtesë nuk u shënua asnjë gol dhe nga penalltitë, blutë u treguan më të saktë, duke fituar 5-4.
Në stadiumin “Elbasan Arena” u zhvillua një ndeshje shumë e fortë nga të dyja skuadrat. Për blutë, golat i shënoi Peter Itodo Mandela (2), ndërsa për Egnatian realizuan Guindo e Bakayoko.
Ekipet e nisën me këtë formacion titullar:
Egnatia: Dajsinani, Xhemajli, Sota, Alijev, Fangaj, Aleksi, Zejnullai, Fernando, Ujka, Lushkja, Guindo.
Dinamo City: Teqja, Hoxha, Aliji, Lorran, Meksi, Qefalija, Karamba, Tiago, Zabërgja, Vila, Mandela.
Goli i parë i takimit u shënua nga Itodo Mandela në minutën e 19-të ndërsa rrogozhinasit barazuan takimin në fundin e pjesës së parë me Guindon. Në fraksionin e dytë, Itodo Mandela shënoi golin e dytë në minutën e 61-të. Kur gjithçka po shkonte drejt fundit, Egnatia barazoi 2-2 dhe sfida shkoi në shtesë.
Të dy pjesët e kohës shtesë, nuk prodhuan asnjë gol dhe Kupa e Shqipërisë u vendos nga penalltitë, aty ku Dinamo triumfoi 5-4, duke siguruar titullin e 14-të në histori të Kupës së Shqipërisë. Pas përfundimit të ndeshjes finale, u zhvillua ceremonia e dhënies së medaljeve dhe trofeut të Kupës, ku të pranishëm ishin Presidenti i FSHF-së, Armand Duka e Sekretari i Përgjithshëm, Ilir Shulku. Duka i dorëzoi medaljet dhe trofeun e Kupës së Shqipërisë, skuadrës së Dinamo City-t.
