Një ekip shkencëtarësh zbuloi një strukturë shkëmbore të pazakontë rreth 60 kilometra larg ishullit Rarotonga, pjesë e Ishujve Cook në Oqeanin Paqësor Jugor. Zbulimi ndodhi rastësisht, kur anija kërkimore M/V Anuanua Moana e Kiva Marine u detyrua të largohej nga porti për t’i lënë vend një tjetër anijeje. Shkencëtarët përfituan nga rasti për të eksploruar zonën dhe nisën projektin kërkimor ARTEX2025, të udhëhequr nga Autoriteti i Mineraleve të Fundit të Detit të Ishujve Cook.
Gjatë hetimeve të para, ata zbuluan një zinxhir vullkanesh nënujore, disa prej të cilëve mund të jenë ende aktivë. Aktiviteti vullkanik në këtë zonë ka nisur miliona vite më parë, kur shpërthimet e magmës në fundin e oqeanit formuan struktura që në disa raste mund të çojnë deri në krijimin e ishujve vullkanikë.
Por ajo që befasoi më shumë ekipin ishte një vullkan i ri, i fshehur nën sipërfaqen e ujit. Përreth tij u zbuluan edhe disa vullkane të tjerë, si Tama, një vullkan tepër i ri, dhe Pepe, një gjigant me një lartësi prej një kilometri. Rezultatet përfundimtare të projektit pritet të publikohen së shpejti, duke sjellë më shumë dritë mbi këtë rajon misterioz të Tokës.
Ndërkaq, në një cep të largët të Oqeanit Paqësor ndodhet Pika Nemo, vendi më i izoluar në Tokë, aq sa shpesh astronautët në Stacionin Ndërkombëtar Hapësinor janë njerëzit më të afërt me të. Hapësira tokësore më e afërt ndodhet 2,700 kilometra larg, ndërsa stacioni hapësinor është në një distancë maksimale prej 416 kilometrash. Ky vend është kaq i largët saqë është shfrytëzuar nga agjencitë hapësinore si një “varrezë hapësinore”.
Rusia, Europa dhe Japonia kanë hedhur aty fragmente satelitësh, mbetje të stacionit Mir dhe pjesë të tjera të anijeve kozmike. Megjithatë, sipas ekspertëve, këto mbetje nuk përbëjnë ndonjë rrezik të madh për ekosistemin, përveç rasteve të rralla të ndotjes nga karburantet. Për shkak të izolimit të tij, Pika Nemo ka qenë burim teorish dhe misteresh.
