Një analizë e detajuar e një skanimi digjital me përmasa të plota të Titanikut ka zbuluar një pasqyrë të re në orët e fundit të anijes së mbytur shumë vite më parë. Videoja 3D tregon mënyrën sesi anija u nda në dysh, ndërsa u mbyt pasi goditi një ajsberg në vitin 1912, ku 1500 pasagjerë humbën jetën në katastrofë. Skanimi ofron një pamje të re të dhomës së bojlerit, duke konfirmuar rrëfimet e dëshmitarëve okularë se inxhinierët punuan deri në fund për të mbajtur ndezur dritat e anijes.
Dhe një simulim kompjuterik tregon gjithashtu se shpimet në byk me madhësinë e copave të letrës A4 çuan në mbytjen e anijes. “Titanic është dëshmitarja e fundit okulare e mbijetuar e katastrofës dhe ajo ka ende histori për të treguar,” tha Parks Stephenson, një analist i Titanikut. Skanimi është studiuar për një dokumentar të ri nga National Geographic dhe Atlantic Productions të quajtur Titanic: The Digital Resurrection.
Anija e mbytur e cila shtrihet 3800 metra poshtë në ujërat e akullta të Atlantikut, u hartua duke përdorur robotë nënujorë, shkruan A2 CNN. Më shumë se 700,000 imazhe, të marra nga çdo kënd, u përdorën për të krijuar “binjakun dixhital”, i cili u zbulua ekskluzivisht në botë nga BBC News në 2023. Për shkak se rrënoja është kaq e madhe dhe shtrihet në errësirën e thellësive, eksplorimi i saj me zhytëse tregon vetëm pamjet magjepsëse, por jo më shumë. Skanimi, megjithatë, ofron pamjen e parë të plotë të Titanikut. Por, thelbi i asaj që ka mbetur është një grumbull metali i gërryer. Dëmi u shkaktua pasi anija u nda në gjysmë.
Ndërkaq një gazetë që përshkruan pritjen e mundimshme me të cilën u përballën familjet në bordin e Titanikut është zbuluar në pjesën e pasme të një gardërobë në Angli pas më shumë se një shekulli. Pasojat e tragjedisë janë kapur në mënyrë tronditëse në imazhet e paraqitura në gazetën 112-vjeçare. E datës 20 prill 1912, faqja e parë e gazetës britanike The Daily Mirror tregon dy gra në Southampton, porti anglez nga ku nisi Titaniku, në pritje të dërgimit të listës së të mbijetuarve. Titulli i gazetës shkruan: “Një nga mijëra tragjeditë që e bëri fundosjen e Titanikut më të tmerrshmen në historinë botërore”.
