Më parë besohej se mushkëritë nuk kishin aftësi rigjenerimi, por studimet e reja tregojnë të kundërtën, shpjegon Charlotte Dean nga Imperial College London. Sipas saj, mushkëritë kanë një kapacitet të konsiderueshëm për t’u vetë-riparuar, sidomos pas ndërprerjes së duhanit, duke qenë se janë organe jetike të ekspozuara vazhdimisht ndaj ndotjes, infeksioneve dhe substancave të dëmshme.
Megjithatë, kjo aftësi nuk duhet të keqinterpretohet si garanci e plotë për rikuperim. Edhe pse ndalimi i duhanit përmirëson ndjeshëm shëndetin e mushkërive, disa dëmtime mund të mbeten të përhershme. Pirja e duhanit dhe përdorimi i cigareve elektronike i ekspozojnë mushkëritë ndaj grimcave toksike që mund të shkaktojnë ndryshime gjenetike, dëmtime të indeve dhe rritje të rrezikut për sëmundje serioze, përfshirë kancerin.
Dean thekson se rreziku nuk zhduket plotësisht edhe pas lënies së duhanit, pasi proceset e dëmshme mund të kenë nisur tashmë në organizëm. Për këtë arsye, ndalimi i hershëm i duhanit është thelbësor, duke qenë se aftësia e trupit për riparim zvogëlohet me moshën, ngjashëm me indet e tjera si kockat.
Një studim i fundit shkencor sugjeron se infeksionet e rrugëve të frymëmarrjes, si ato që shkaktojnë ftohjen, mund të reduktojnë përkohësisht përhapjen e kancerit në mushkëri nga pjesë të tjera të trupit, sipas “The Guardian”. Hulumtimi, i kryer nga shkencëtarë në Universitetin e Oxfordit dhe institucione të tjera kërkimore, u fokusua në efektet e virusit sincicial respirator (RSV), një virus shumë i përhapur që shkakton simptoma të ngjashme me ftohjen dhe infekton shumicën e njerëzve që në moshë të hershme. Në eksperimentet laboratorike me minj, studiuesit zbuluan se infektimi me RSV pengonte qelizat e kancerit të gjirit, që të vendoseshin dhe të zhvilloheshin në mushkëri.
