Ish-anëtarja e grupit “Danity Kane”, Aubrey O’Day, ka reaguar pas dënimit me burg të producentit të njohur P. Diddy, duke dërguar një mesazh të fortë për artistët e rinj që po përpiqen të bëjnë emër në industrinë muzikore.
Në një postim në rrjetin social X (ish-Twitter), O’Day paralajmëroi talentet e reja të jenë të kujdesshëm ndaj atyre që ndodhen në pozicione pushteti dhe mund të përfitojnë prej tyre.
Le të shërbejë kjo si paralajmërim për individët e rinj e ambiciozë që ndjekin ëndrrat e tyre. Rreziku nuk qëndron vetëm tek ajo që gjykata mund të dyshojë në dëshminë tuaj, por tek vitet e dhimbjes që mund të kaloni për shkak të abuzimit me pushtetin
-shkroi ajo.
Këngëtarja shtoi se çdo shenjë e sjelljes së papërshtatshme duhet të merret seriozisht:
Në momentin që dikush në një pozicion pushteti tejkalon kufijtë dhe kërkon më shumë sesa është e arsyeshme, duhet të tërhiqeni. Asnjë ëndërr, sado e madhe, nuk vlen më shumë se mirëqenia juaj. Nëse diçka duket e gabuar, besojini instinktit tuaj dhe largohuni.
O’Day ka folur hapur për përvojat e saj me P. Diddy edhe më parë. Në vitin 2023, ajo deklaroi se producenti i kishte kërkuar të nënshkruante një marrëveshje konfidencialiteti për të mos përmendur emrin e tij apo kompaninë e tij diskografike.
Reagimi i saj vjen pak ditë pasi Diddy u dënua me më shumë se katër vjet burg për akuza të lidhura me abuzim dhe dhunë. Përveç dënimit, ai është gjobitur me 500,000 dollarë dhe do të mbetet nën mbikëqyrje për pesë vite.
Gjatë seancës, producenti kërkoi falje publike, duke e quajtur sjelljen e tij “të neveritshme dhe të turpshme”.
Aubrey O’Day, e cila dikur ishte një nga artistet që punonte ngushtë me Diddyn, u bë një ndër zërat më të fortë kundër abuzimeve në industrinë e muzikës, duke u shndërruar sot në një zë mbështetës për brezin e ri të artistëve.
