Një ndjesi e pakëndshme, rroba që shtrëngojnë papritur dhe beli që duket sikur është dyfishuar, fryrja e barkut është një nga shqetësimet më bezdisëse të përditshme. Për shumë persona, ajo shfaqet pa paralajmërim dhe ndikon jo vetëm në pamje, por edhe në rehatinë fizike dhe humorin.
Fryrja lidhet shpesh me sindromën e zorrës së irrituar, një nga çrregullimet më të zakonshme të aparatit tretës tek të rriturit në botën perëndimore.
Edhe pse shumë njerëz arrijnë të identifikojnë ushqimet që i shkaktojnë këtë problem, kur fryrja bëhet e shpeshtë dhe ndërhyn në jetën e përditshme, mjekët këshillojnë kontroll dhe trajtim të përshtatshëm.
Por përpara se të alarmoheni, natyra ofron disa zgjidhje të thjeshta dhe efektive. Disa bimë mjekësore të përdorura prej shekujsh ndihmojnë në qetësimin e stomakut dhe “çfryrjen” e barkut.
Si t’i konsumoni bimët?
Mënyra më e sigurt dhe efektive është në formë çaji: një lugë çaji nga bima në një filxhan me ujë të nxehtë. Mos konsumoni më shumë se dy filxhanë në ditë.
Mentja – aleati klasik i tretjes
Mentja ka veti të forta tretëse. Ajo relakson zorrët, lehtëson dhimbjet dhe ul ndjeshëm fryrjen. Në shumë kultura, çaji i mentës pihet pas vakteve për të ndihmuar tretjen dhe për të freskuar frymëmarrjen. Shpesh kombinohet me kamomil dhe anise për efekt maksimal.
Melisa (bari i limonit)
Ideale për ata që vuajnë nga fryrje të lidhura me stresin dhe ankthin. Melisa qetëson stomakun, redukton shtrëngimin dhe ndihmon edhe në përmirësimin e gjumit falë aromës së saj relaksuese.
Nenexhiku
Me veprim të ngjashëm me mentën, nenexhiku “zbut” stomakun, ndihmon kundër urthit dhe lufton fryrjen pas vakteve të rënda.
Anise – sekreti i vogël i farave
Farat e anises veprojnë si antispazmatik dhe laksativ i lehtë. Ato ndihmojnë në reduktimin e gazrave dhe qetësimin e dhimbjeve të stomakut.
Kamomili – zgjidhja e butë për të gjithë
Kamomili është një nga bimët më të përdorura për problemet tretëse. Pas një vakti që ka shkaktuar fryrje, një filxhan çaj kamomili mund të bëjë mrekulli. Përveç efektit qetësues, ka edhe veprim të lehtë diuretik.
Ushqimet që shpesh e përkeqësojnë fryrjen
Edhe pse reagimi ndryshon nga personi në person, disa ushqime njihen për tendencën për të shkaktuar fryrje.
Nëse vini re shqetësime, përpiquni t’i shmangni, veçanërisht para rasteve kur doni të ndiheni rehat në trupin tuaj:
-Thjerrëza, fasule, qiqra
-Angjinare, shpargull, lakër Brukseli, brokoli, lulelakër, presh
-Speca, bizele, kastravecë, qepë
-Pije të gazuara
-Misër dhe produkte nga gruri integral
-Qumësht, djathëra të butë, akullore dhe ushqime me laktozë
Në fund, fryrja nuk është vetëm çështje ushqimi, është sinjal që trupi po kërkon më shumë vëmendje.
Dëgjojeni, qetësojeni dhe shpeshherë do t’ju falënderojë me një bark më të sheshtë dhe më pak shqetësime.
