Modelja e njohur Bella Hadid ka ndarë publikisht një rrëfim prekës mbi betejën e saj të gjatë me ankthin dhe depresionin, duke u bërë një zë i rëndësishëm për ndërgjegjësimin rreth shëndetit mendor.
Përmes një postimi emocional në rrjetet sociale, ajo iu drejtua ndjekësve me mesazhe ngushëlluese dhe inkurajuese, duke theksuar se ndjenjat e vështira nuk duhet të përjetohen në heshtje.
Në postimin e saj, Hadid publikoi disa citate motivuese që pasqyrojnë thellësisht përjetimet e saj emocionale dhe ato të shumë njerëzve që luftojnë çdo ditë me ankthin.
Kur barra bëhet shumë e rëndë dhe e ardhmja duket e zymtë, është në rregull të pushosh për pak. Edhe kur ndihesh sikur e ke humbur shkëndijën, kujto se mbijetesa është gjithashtu forcë
-shkroi ajo.
Modelja shtoi se ndjesia e mbingarkesës dhe pasigurisë shpesh na pengon të mendojmë qartë.
Në momente të tilla, mendimet sillen njëra pas tjetrës pa pushim. Ndalo. Merr frymë. Do të jesh mirë. Mos mendo për të nesërmen, përqendrohu vetëm te e sotmja
-vazhdoi ajo.
Bella Hadid foli hapur për përvojën e saj personale me shëndetin mendor, duke treguar se kjo betejë ka qenë një pjesë e gjatë dhe e lodhshme e jetës së saj.
Kam mbajtur barrën e ankthit dhe depresionit për vite. Ndonjëherë bëhet aq e rëndë sa më paralizon plotësisht, edhe pse askush nga jashtë nuk mund ta kuptojë. Shpesh e filloja ditën me lot
Në fund të postimit, modelja e përfundoi me një mesazh mbështetjeje për të gjithë ata që po përballen me përvoja të ngjashme:
Për të gjithë ju që luftoni çdo ditë me këto ndjenja – nuk jeni vetëm. Ju dua shumë.
Ky rrëfim i sinqertë i Hadid ka prekur miliona ndjekës anembanë botës dhe është vlerësuar si një hap i guximshëm për normalizimin e bisedave rreth shëndetit mendor në botën e famës, ku shpesh duket sikur gjithçka është perfekte.
